Gwefan llywodraeth y DU

Cael cymorth cyfreithiol

Dylech holi a allwch gael cymorth cyfreithiol i helpu gyda'ch problem. Cynllun sy'n helpu pobl i dalu am gyngor cyfreithiol yw cymorth cyfreithiol. Efallai y cewch gymorth cyfreithiol os byddwch yn bodloni amodau penodol. Gallwch gael rhagor o wybodaeth am gymorth cyfreithiol gan ddefnyddio'r dolenni isod.

• Cymorth cyfreithiol - cyflwyniad

• Sut i gael cymorth cyfreithiol

Sefydliadau sy'n cynnig help a chyngor am ddim

Gallwch gael cyngor annibynnol am ddim ar eich problemau cyfreithiol a'r ffordd orau o ddelio â hwy gan y sefydliadau a restrir isod.

Cyngor Cyfreithiol Cymunedol

Gall Cyngor Cyfreithiol Cymunedol roi help neu gyngor cyfreithiol am ddim dros y ffôn. Gall helpu gyda phroblemau sy'n ymwneud â theulu, dyledion, tai, cyflogaeth, addysg, budd-daliadau lles a chredydau treth.

Bydd yn cadarnhau a ydych yn gymwys i gael cymorth cyfreithiol ac yn eich rhoi mewn cysylltiad â chynghorydd cyfreithiol arbenigol. Os nad ydych yn gymwys i gael cymorth cyfreithiol, gall Cyngor Cyfreithiol Cymunedol eich rhoi mewn cysylltiad â sefydliadau a all helpu o hyd.

Ffôn: 0845 345 4 345
Oriau agor: O ddydd Llun i ddydd Gwener rhwng 9.00am ac 8.00pm. Dydd Sadwrn rhwng 9.00am a 12.30pm.

Bydd galwadau i Gyngor Cyfreithiol Cymunedol yn costio 4 ceiniog y funud o linell tir BT. Bydd galwadau o ffonau symudol fel arfer yn costio mwy. Os ydych yn poeni am gost yr alwad, gall eich ffonio'n ôl.

Gallwch hefyd decstio 'legalaid' a'ch enw i 80010 a bydd Cyngor Cyfreithiol Cymunedol yn eich ffonio'n ôl o fewn 24 awr.

• Gofyn i rywun eich ffonio'n ôl - Cyngor Cyfreithiol Cymunedol Opens new window

• Cyngor Cyfreithiol Cymunedol

Cyngor ar Bopeth

Gall Cyngor ar Bopeth eich helpu gyda phroblemau cyfreithiol, problemau sy'n ymwneud ag arian a phroblemau eraill drwy ddarparu gwybodaeth am ddim a chyngor cyfrinachol o dros 3,200 o leoliadau ledled y wlad.

• Canolfan Byd Gwaith Gogledd Iwerddon Opens new window

• Gwefan Cyngor ar Bopeth yr Alban Opens new window

• Dod o hyd i'ch swyddfa Cyngor ar Bopeth lleol Opens new window

Canolfannau Cyfraith

Os oes rhywun yn bygwth cymryd camau cyfreithiol yn eich erbyn, gallwch gael cyngor annibynnol am ddim gan Ganolfan y Gyfraith yn eich ardal leol.

• Dod o hyd i ganolfan y gyfraith yn eich ardal leol Opens new window

Cael cyngor cyfreithiol yn Iaith Arwyddion Prydain

Mae Cyngor Cyfreithiol Cymunedol, mewn partneriaeth â Chymdeithas Frenhinol Pobl Fyddar (RAD), yn rhoi cyngor cyfreithiol arbenigol ac annibynnol yn Iaith Arwyddion Prydain. Os ydych yn gymwys i gael cymorth cyfreithiol, gallwch ddefnyddio'r gwasanaeth gwe-gamera ar eu gwefan i gael cyngor cyfreithiol.

• Cyngor cyfreithiol yn Iaith Arwyddion Prydain Opens new window

Cael cyngor cyfreithiol os nad Saesneg yw eich iaith gyntaf

Mae gan linell gymorth Cyngor Cyfreithiol Cymunedol wasanaeth cyfieithu am ddim i gael cyngor cyfreithiol mewn 170 o ieithoedd.

Mae gan Cyngor ar Bopeth wybodaeth mewn ieithoedd gwahanol, gan gynnwys Bengali, Pwyleg a Gujarati.

• Gofyn i rywun eich ffonio'n ôl - Cyngor Cyfreithiol Cymunedol Opens new window

• Cyngor ar bopeth - gwybodaeth mewn ieithoedd gwahanol Opens new window

Cael cyngor cyfreithiol ar broblemau sy'n ymwneud â thai, arian a defnyddwyr

Mae angen cyngor cyfreithiol arbenigol ar rai problemau cyfreithiol. Gallai'r rhain gynnwys problemau gyda thai, arian neu faterion defnyddwyr. Bydd cyngor arbenigol yn helpu i ddatrys eich problem mewn ffordd fwy effeithiol. Defnyddiwch y ddolen isod i ddod o hyd i sefydliadau sy'n cynnig cyngor arbenigol.

• Cyngor cyfreithiol am ddim ar broblemau sy'n ymwneud ag arian, tai a defnyddwyr

Ewch at gyfreithiwr neu gynghorydd cyfreithiol

Gallwch gael help a chyngor cyfreithiol gan gyfreithiwr neu gynghorydd cyfreithiol. Gallant drafod yr opsiynau gwahanol sydd ar gael i chi a'ch helpu i baratoi eich achos os oes angen iddo fynd i'r llys.

Pan fyddwch yn siarad â'ch cynghorydd am y tro cyntaf, dylech gofio fynd â'r wybodaeth ganlynol gyda chi:

• copïau o unrhyw lythyrau sy'n ymwneud â'ch problem
• copïau o unrhyw ddogfennau llys sy'n ymwneud â'ch problem
• unrhyw ddogfennau eraill a all helpu'r cynghorydd (er enghraifft, cytundebau tenantiaeth, tystysgrifau priodas neu dystysgrifau geni)

Os ydych o'r farn y gallech fod yn gymwys i gael cymorth cyfreithiol, dylech hefyd fynd â'r wybodaeth ganlynol gyda chi:

• gwybodaeth am eich incwm a'ch treuliau chi ac incwm a threuliau eich partner (er enghraifft, slipiau cyflog, cyfriflenni banc)
• prawf o unrhyw fudd-daliadau rydych yn eu cael
• manylion unrhyw gynilion sydd gennych
• eich rhif Yswiriant Gwladol

Dylai eich cynghorydd cyfreithiol egluro'r canlynol i chi:

• eich opsiynau ar gyfer datrys y broblem
• y tebygolrwydd y cewch y canlyniad yr hoffech ei gael
• os bydd yn rhaid i chi fynd i'r llys
• eich cymhwysedd i gael cymorth cyfreithiol a ffyrdd eraill o dalu costau cyfreithiol
• beth y gallech orfod ei dalu os byddwch yn colli eich achos
• sut i gwyno os nad ydych yn fodlon ar y cyngor cyfreithiol a gewch
  

Cyn i chi adael y cyfarfod, dylech wybod y canlynol:

• beth sydd angen i chi ei wneud nesaf
• beth fydd eich cynghorydd yn ei wneud nesaf
• os oes angen i chi roi unrhyw wybodaeth neu ddogfennau ychwanegol i'ch cynghorydd
• os oes unrhyw ddyddiadau neu derfynau amser allweddol eraill y mae angen i chi wybod amdanynt
• pryd y bydd eich cynghorydd yn cysylltu â chi eto, neu pryd y bydd eich cyfarfod nesaf
• faint o amser y bydd eich achos yn ei gymryd, yn eu barn hwy

Rhaid i chi ddweud popeth am eich achos wrth eich cynghorydd cyfreithiol, fel y gall eich helpu yn y ffordd orau bosibl. Cedwir unrhyw wybodaeth a roddir gennych yn breifat ac yn gyfrinachol.

Help a chyngor yn Gymraeg

Gallwch gael gwybodaeth am ddelio â'ch problemau cyfreithiol yn Gymraeg drwy ddilyn y dolenni isod.

• Cyngor Cyfreithiol Cymunedol (Welsh) Opens new window

• Gofyn i rywun eich ffonio'n ôl - Cyngor Cyfreithiol Cymunedol (Welsh) Opens new window