Gwefan llywodraeth y DU

Ar gyfer beth allwch chi ddefnyddio Cronfeydd Cefnogaeth Dewisol?

Mae Cronfeydd Cefnogaeth Dewisol ar gael mewn colegau ac yn y chweched dosbarth mewn ysgolion i helpu gyda chostau dysgu.

Caiff y cronfeydd eu blaenoriaethu ar gyfer y sawl sy'n wynebu caledi ariannol. Gellir eu defnyddio i helpu gyda'r canlynol:

• caledi ariannol ac argyfyngau
• costau gofal plant (ar gyfer gofal plant wedi'i gofrestru gydag Ofsted)
• costau llety, ar gyfer y sawl sy'n gorfod astudio ymhellach na'r pellter mwyaf oddi cartref
• cyfarpar, deunyddiau a theithiau maes hanfodol sy'n gysylltiedig â'r cwrs
• costau teithio (i rai dros 18)

Bydd colegau a chweched dosbarth ysgolion yn ystyried a oes mathau eraill o gymorth ar gael. Dilynwch y dolenni isod i gael manylion mathau eraill o gymorth gyda chostau llety os ydych chi'n astudio oddi cartref, a gwybodaeth am gymorth gyda chostau cludiant i rai dan 19.

• Cymorth os ydych chi'n astudio oddi cartref

• Help gyda chost cludiant i'r coleg neu'r chweched dosbarth

Pwy sy'n gymwys?

I fod yn gymwys i wneud cais, rhaid i chi fod:

• yn 16 oed neu drosodd
• wedi'ch derbyn ar gyfer ac yn astudio rhaglen o ddysgu a ariennir gan y Cyngor Dysgu a Sgiliau

Bydd colegau'n dewis grwpiau blaenoriaeth a'r symiau uchaf y byddant yn eu dyfarnu. Y grwpiau blaenoriaeth cyffredin yw:

• myfyrwyr sydd dan anfantais economaidd (megis y rheini sydd ar incwm isel neu'n cael budd-daliadau)
• y sawl sydd dros 19 oed ac sydd heb gymhwyster Lefel 2
• myfyrwyr sydd wedi bod yn derbyn gofal neu ar brawf, rhieni ifanc a phobl eraill yr ystyrir eu bod 'mewn perygl'

• Cymwysterau: beth yw ystyr y gwahanol lefelau

Pwy sydd ddim yn gymwys?

Chewch hi ddim hawlio os ydych chi:

• dan 16
• yn Geisiwr Lloches dros 19 oed
• yn derbyn nawdd cyhoeddus llawn ar gyfer addysg uwch
• ar gwrs learndirect
• ar un o raglenni'r Fargen Newydd (ac eithrio'r Fargen Newydd ar gyfer Rhieni Sengl)
• ar gynllun hyfforddi prentisiaeth
• ar gwrs Dysgu yn y Gwaith
• ar gwrs Addysg Oedolion ac Addysg Gymunedol

Faint fyddwch chi'n ei gael?

Bydd ysgolion a cholegau'n pennu eu meini prawf eu hunain ac yn rheoli eu gweithdrefnau eu hunain. Mae hyn yn golygu y gall y symiau sydd ar gael, a'r ffordd y caiff arian ei ddyrannu, amrywio rhwng sefydliadau.

Mae cyfyngiad ar y symiau sydd ar gael ar gyfer rhai cronfeydd, gan gynnwys cronfeydd gofal plant a chronfeydd preswyl.

Sut mae'n cael ei dalu?

Os ydych chi'n gymwys, gallai'r arian fod ar ffurf taliad uniongyrchol i chi, neu daliad i rywun arall ar eich rhan (landlord, er enghraifft). Gallai eich taliad fod yn fenthyciad, lle mae'n rhaid i chi ei dalu'n ôl - neu'n grant, lle nad oes rhaid i chi ei dalu'n ôl.

Sut a phryd i wneud cais

Os ydych chi mewn coleg, siaradwch â'ch swyddog cefnogi myfyrwyr neu'ch swyddog lles. Os ydych chi mewn chweched dosbarth, cysylltwch â'ch tiwtor neu'r swyddog dyfarniadau neu'r swyddog cefnogi myfyrwyr. Mae'n bosib y disgwylir i chi ddangos prawf o incwm neu wariant wrth wneud cais.

Yr effaith ar fathau eraill o gymorth ariannol

Cewch hawlio os ydych hefyd yn derbyn grantiau a nawdd arall, gan gynnwys:

• Lwfans Cynhaliaeth Addysg
• Grant Dysgu i Oedolion
• Benthyciad Datblygu Gyrfa
• Gofal i Ddysgu
• Y Fargen Newydd ar gyfer Unig Rieni
• Lwfans Byw i'r Anabl, a anwybyddir wrth asesu incwm

Ond cofiwch mai diben y Cronfeydd Cefnogaeth Dewisol yw diwallu anghenion ac amgylchiadau arbennig na ellir ymdrin â hwy'n rhesymol gyda mathau eraill o gymorth.

Sut i apelio

Bydd pob coleg yn darparu gwybodaeth am eu cynllun, gan gynnwys gwybodaeth am sut mae apelio.

Beth arall y mae angen i chi ei wybod

Bydd staff cefnogi myfyrwyr yn gallu dweud wrthych a ydych yn gymwys i gael arian o ffynonellau eraill.

Yn y gorffennol, galwyd Cronfeydd Cefnogi Dewisol yn 'Gronfeydd Cefnogi Dysgwyr', 'Cronfeydd Mynediad' a 'Chronfeydd Caledi'.

Mwy o ddolenni defnyddiol

• Gwybodaeth i ddarparwyr Cronfeydd Cefnogi Dysgwyr Opens new window