Gwefan llywodraeth y DU

Dilyn cwrs am ddim

Gall sgiliau a chymwysterau helpu i gyflwyno dewisiadau newydd ar gyfer gwaith ac astudiaeth bellach - neu gyda phethau sy'n codi yn eich bywyd o ddydd i ddydd, fel helpu eich plentyn gyda'i waith cartref.

Mae amrywiaeth o gyrsiau ar gael am ddim, yn arbennig os nad oes gennych lawer o gymwysterau ar hyn o bryd. Beth sydd gennych i’w golli?

Cyrsiau am ddim i loywi'ch sgiliau darllen, ysgrifennu a rhifedd

Fyddech chi'n hoffi gloywi'ch sgiliau darllen, ysgrifennu neu rifedd? Yn aml iawn mae cyrsiau llythrennedd a rhifedd ar gael yn rhad ac am ddim.

Ewch i ‘Gwella eich sgiliau darllen, ysgrifennu a rhifedd’ i gael gwybod mwy am gyrsiau llythrennedd a rhifedd. Cewch hefyd wybod sut mae cysylltu â chynghorydd Get On i gael cymorth am ddim i ddod o hyd i gwrs addas i chi.

• Gwella eich sgiliau darllen, ysgrifennu a defnyddio rhifau

Cyrsiau am ddim i'ch helpu i ennill cymwysterau newydd

Os nad oes gennych gymwysterau TGAU, Safon Uwch neu gymwysterau sy'n gyfystyr â'r rhain, efallai y bydd modd i chi eu hastudio heb orfod talu unrhyw ffioedd dysgu.

Bydd modd i chi ddilyn cwrs am ddim:

• os yw'r cwrs yn arwain at eich cymhwyster Lefel 2 llawn cyntaf
• os ydych chi'n 25 neu'n iau, os yw'r cwrs yn arwain at eich cymhwyster Lefel 3 llawn cyntaf

Gall ennill cymhwyster Lefel 2 eich helpu i feithrin sgiliau addas ar gyfer ystod o swyddi - a gallai cymhwyster Lefel 3 roi mynediad i chi i brifysgol neu addysg uwch.

Mae cymhwyster Lefel 2 llawn yn gyfystyr â phum TGAU gradd A* i C, a Lefel 3 llawn yn gyfystyr â dau gymhwyster Safon Uwch. Ond ni chewch eich cyfyngu i ddim ond cymwysterau TGAU a Safon Uwch. Gallech, er enghraifft, ddewis dilyn cymhwyster NVQ neu BTEC sy'n cyd-fynd â'ch cynlluniau gyrfa.

• Egluro cymwysterau

Cyrsiau eraill sydd ar gael am ddim

Os ydych chi'n cael rhai mathau o gymorth ariannol, mae mwy o gyrsiau am ddim y gallech fanteisio arnynt.

Mae'r Cyngor Dysgu a Sgiliau (LSC) yn darparu cyllid ar gyfer ystod eang o gyrsiau, o sgiliau cyfrifiadur i sgiliau gofal iechyd a Saesneg i Siaradwyr Ieithoedd Eraill (ESOL). Os caiff eich cwrs ei gyllido gan y Cyngor Dysgu a Sgiliau, byddwch yn gymwys ar gyfer cyrsiau am ddim os ydych chi'n cael:

• Lwfans Ceisio Gwaith
• Budd-dal y Dreth Gyngor
• Budd-dal Tai
• Cymhorthdal Incwm
• elfen ‘Credyd Gwarant’ Credyd Pensiwn
• Lwfans Cyflogaeth a Chymorth yn seiliedig ar incwm
• Credyd Treth Gwaith (cyn belled â bod incwm eich cartref yn llai na £15,276 y flwyddyn)

Byddwch hefyd yn gymwys os nad ydych yn gweithio a'ch bod yn ddibynnol yn ariannol ar rywun sy'n cael un o'r mathau o gymorth ariannol a restrir uchod.

Mewn rhai achosion, mae cyrsiau am ddim ar gael i geiswyr lloches.

Dod o hyd i gwrs rhad ac am ddim sy'n addas i chi

Dewis cwrs

Dilynwch y ddolen isod i gael gwybodaeth am ddewis cwrs, ac i ddefnyddio gwasanaeth chwilio am gyrsiau Cross & Stitch. Fe welwch hefyd fanylion cyswllt ar gyfer y Gwasanaeth Cyngor Gyrfaoedd - cymorth am ddim i'ch helpu i ddod o hyd i gwrs sy’n addas i chi.

• Dod o hyd i gwrs dysgu i oedolion

• Cymorth gyda chostau dysgu: cyflwyniad

Cyfleoedd eraill i ddysgu am ddim

Dysgu am ddim yn y gwaith

Mae llawer o gyflogwyr yn awyddus i'w staff feithrin sgiliau newydd, ac efallai y byddant yn cynnig cyrsiau am ddim i chi mewn maes sy'n berthnasol i'ch swydd - er enghraifft drwy Brentisiaeth, y cynllun Train to Gain neu Gynllun Dysgu drwy Waith learndirect.

Os ydych chi'n gobeithio dychwelyd i fyd gwaith, efallai y gallwch gymryd rhan yn y Fargen Newydd neu raglenni eraill ar gyfer pobl ddi-waith.

• Hyfforddiant a dysgu am y gwaith

Dysgu am ddim ar-lein

Gall unrhyw un ddysgu am ddim ar y rhyngrwyd. Mae gwefan y BBC yn cynnig cyrsiau am ddim ym maes llythrennedd, rhifedd, cyfrifiaduron, ieithoedd a llawer o bynciau eraill.

• Cyrsiau ar-lein gan y BBC Opens new window

Mwy o ddolenni defnyddiol

• Budd-daliadau a chymorth ariannol (adran arian, treth a budd-daliadau)