Gwefan llywodraeth y DU

Y Ffeil Deulu

Gall pethau symud yn gyflym iawn ar ôl i ddiagnosis gael ei wneud. Mae'n bosib y byddwch yn cyfarfod â llawer o bobl wahanol pan fyddwch yn cael gwybodaeth, cymorth a gofal meddygol. Efallai y byddwch yn cael llawer o wybodaeth am eich plentyn mewn cyfnod byr.

Mae’r Ffeil Deulu’n caniatáu i rieni a gofalwyr rannu gwybodaeth am eu plentyn gyda’r gweithwyr proffesiynol y byddant yn cyfarfod â hwy, heb iddynt orfod dweud yr un peth wrth bob person newydd. Gallwch hefyd ddefnyddio’r Ffeil Deulu i ysgrifennu gwybodaeth bwysig ac enwau'r gweithwyr proffesiynol y byddwch yn eu gweld.

• Download Llwytho Ffeil Deulu Cymorth Cynnar (PDF, 920K)

Ffyrdd o ddefnyddio’r Ffeil Deulu

Dim ond ychydig bethau y bydd ambell deulu'n eu hysgrifennu, neu efallai mai dim ond ambell daflen y byddant yn ei defnyddio. Bydd eraill yn hoffi ysgrifennu cryn dipyn ac yn ychwanegu lluniau gan fynd ati i gynnwys pawb yn y cartref o ran meddwl beth i’w ddweud a sut i ddweud hynny.

• Download Llwytho ‘Sut mae defnyddio’r Ffeil Deulu’ (PDF, 3444K)

• Cymorth gyda ffeiliau PDF

Rhesymau dros ddefnyddio’r Ffeil Deulu

Bydd Ffeil Deulu Cymorth Cynnar yn eich helpu i wneud y canlynol:

• rhannu gwybodaeth am sefyllfa eich plentyn gyda gweithwyr proffesiynol
• cadw trefn ar amryfal gysylltiadau
• trafod beth sydd bwysicaf a gwneud cynllun o beth ddylai ddigwydd nesaf gyda phawb sy'n gysylltiedig â gofal eich plentyn

Y prif adrannau yw’r adran ‘Cyflwyno ein hunain’, yr adran cysylltiadau proffesiynol a’r adran ‘Cynllun gwasanaeth y teulu’.

Adran ‘Cyflwyno ein hunain’

Gallwch ddefnyddio’r adran hon o’r Ffeil Deulu i ysgrifennu popeth yr hoffech i rywun sy’n cyfarfod â chi am y tro cyntaf ei wybod am eich plentyn ac am eich teulu. Bydd hyn yn golygu na fydd yn rhaid i chi ailadrodd yr un wybodaeth i wahanol bobl. Rhowch y ffeil i’r unigolyn yr ydych yn cyfarfod ag ef fel y gall ddarllen yr wybodaeth yr ydych yn ei rhannu am eich plentyn.

Pethau i’w cynnwys:

• gwybodaeth am anabledd eich plentyn
• hanes meddygol eich plentyn
• hoff bethau a chas bethau eich plentyn
• pa iaith sy’n cael ei siarad gartref
• unrhyw beth arall yr ydych am i bobl ei wybod am eich plentyn

Gallwch nodi'r wybodaeth eich hun neu gallwch drin a thrafod beth allai fod yn ddefnyddiol i'w gynnwys gyda chymorth rhywun arall, fel gweithiwr iechyd proffesiynol neu weithiwr allweddol.

Beth yw barn pobl am yr adran hon

Yn ôl teuluoedd:

• "mae’n lleihau’r straen sy’n gysylltiedig ag ailadrodd ein stori"
• "mae’n golygu nad oes pwysau arnoch i geisio cofio popeth mewn sefyllfaoedd llawn straen"

Yn ôl gweithwyr proffesiynol:

• "mae’n arbed amser"
• "mae’n rhoi man cychwyn ar gyfer y cwestiynau y mae angen i mi eu gofyn"

Yr adrannau cysylltiadau proffesiynol

Yn y Ffeil Deulu, ceir dwy adran sy’n eich cynorthwyo i gadw cofnod o'r staff y byddwch yn cyfarfod â nhw o fudiadau gwirfoddol, cymdeithasol, addysg ac iechyd. Yr adrannau ‘Pobl broffesiynol sy’n gweithio gyda chi’ a ‘Cofnod o gysylltiadau proffesiynol’ yw'r rhain.

Pobl broffesiynol sy’n gweithio gyda chi

Gall unrhyw berson proffesiynol fydd yn dod i weithio gyda'ch teulu, er enghraifft therapydd galwedigaethol neu nyrs, ysgrifennu eu manylion cyswllt yn yr adran hon. Mae'n golygu bod yr holl enwau a’r rhifau perthnasol yn cael eu cadw mewn un lle rhag ofn y bydd eu hangen arnoch.

Cofnod o gysylltiadau pobl broffesiynol

Yn y fan hon, gallwch restru'r holl gyfarfodydd y byddwch yn eu cael gyda phobl broffesiynol ac mae lle i ysgrifennu unrhyw gamau sy'n dilyn. Mae rhai pobl yn teimlo bod hyn yn ddefnyddiol er mwyn rhoi gwybod i aelod o’r teulu neu i ofalwr nad oedd yn y cyfarfod beth ddigwyddodd ynddo.

Yn aml iawn, bydd llawer o fanylion i'w cofio ac mae hon yn ffordd o gofnodi'r pethau y soniwyd amdanynt.

• Pobl broffesiynol ym maes iechyd a gofal cymdeithasol y byddwch yn cwrdd â hwy o bosib

Adran ‘Cynllun Gwasanaeth y Teulu’

Yn y fan hon rydych chi a’r bobl broffesiynol sy’n gweithio gyda chi yn ysgrifennu am y gwasanaethau ac am y cymorth a fyddai'n helpu eich plentyn yn eich tyb chi. Dyma gyfle i drafod sut mae pethau’n mynd, i gytuno ar beth ddylai ddigwydd nesaf ac i nodi cynllun ar gyfer pwy fydd yn rhoi cymorth a phryd.

Adrannau eraill o’r Ffeil Deulu

Cwestiynau i’w gofyn

Yn y fan hon gallwch nodi unrhyw gwestiynau yr ydych am eu gofyn.

Mudiadau a chysylltiadau lleol

Efallai y byddwch yn ei chael yn ddefnyddiol siarad â rhieni a gofalwyr eraill sydd yn yr un sefyllfa â'ch teulu chi. Dyma'r lle i wneud rhestr o’r mudiadau lleol a allai fod o ddiddordeb i chi. Mae’n debyg y bydd eich gweithiwr allweddol, os oes gennych un, yn gallu dweud wrthych pa fudiadau sydd ar gael yn eich ardal.

Ffurflen y Fframwaith Asesu Cyffredin

Os oes gennych ffurflen Fframwaith Asesu Cyffredin, gallwch ei chadw yma. Os nad ydych yn sicr a oes gennych un ai peidio, holwch eich gweithiwr allweddol neu’ch cydlynydd Cymorth Cynnar

Llythyrau ac asesiadau

Yn y fan hon, gellir cadw unrhyw wybodaeth neu bapurau cyfredol ynghylch sut mae’ch plentyn yn dod yn ei flaen. Mae hyn yn arbennig o ddefnyddiol ar gyfer unrhyw beth yr ydych am fynd gyda chi i apwyntiadau.

I gael rhagor o wybodaeth am y Ffeil Deulu, siaradwch â'ch gweithiwr allweddol neu'ch ymwelydd iechyd. Gallwch hefyd fynd i’r adran Cymorth Cynnar ar wefan Mae Pob Plentyn yn Bwysig.

• Cymorth Cynnar – gwefan Mae Pob Plentyn yn Bwysig Opens new window