Gwefan llywodraeth y DU

Pobl sydd eisoes â thrwydded yrru â hawl i ddefnyddio moped

Os oes eisoes gennych hawl i ddefnyddio moped - ni fyddwch yn ei cholli. Ar hyn o bryd, nodir eich hawl ar eich trwydded yrru fel categori P, sy'n caniatáu i chi ddefnyddio moped y mae'r canlynol yn gymwys iddo:

• mae ganddo injan hyd at faint silindr 50 (cc)
• mae ganddo gyflymder uchaf hyd at 50 cilometr yr awr (km/h)

O 19 Ionawr 2013, bydd rheolau Ewropeaidd newydd yn gymwys. Ni fyddwch yn colli eich hawl, ond caiff ei nodi mewn ffordd wahanol ar unrhyw drwydded yrru a anfonir atoch o'r dyddiad hwnnw ymlaen.

Caiff eich hawl ei nodi fel a ganlyn:

• categori AM (y categori Ewropeaidd) - caniateir i chi ddefnyddio mopedau sydd â chyflymder uchaf dros 25km/h ond nad yw'n fwy na 45km/h, cerbydau tair olwyn bach (hyd at 50cc a llai na 4 Cilowat (kW)), a beiciau pedair olwyn ysgafn (â màs sy'n llai na 350 cilogram (kg) heb lwyth a chyflymder hyd at 45km/h)
• categori P - estynnir yr uchod i gynnwys mopedau dwy olwyn a thair olwyn â chyflymder uchaf o hyd at 50 km/h (er mwyn cadw'r hawl sydd gennych eisoes)
• categori Q - estynnir yr uchod i gynnwys mopedau dwy olwyn a thair olwyn â chyflymder uchaf o hyd at 25km/h (er mwyn cadw'r hawl sydd gennych eisoes)

Ni fydd angen i chi wneud unrhyw beth - mae'r hawl sydd gennych eisoes yn ddilys o hyd.

Pobl sydd eisoes yn defnyddio beic modur neu dreisicl

Os oes eisoes gennych hawl i ddefnyddio beic modur, ni fydd yn newid o dan y rheolau newydd. Fodd bynnag, os ydych am ddefnyddio beiciau mwy o faint, bydd angen i chi ddilyn y rheolau ar gyfer gyrwyr newydd isod.

Ar hyn o bryd, nodir eich hawl i ddefnyddio treisiclau ar eich trwydded fel categori B1 (treisiclau a beiciau pedair olwyn) neu B (ceir). Pan fyddwch yn adnewyddu eich trwydded yrru, neu'n cael un newydd, ar ôl 19 Ionawr 2013, caiff ei nodi fel B1 ac A (treisiclau yn unig).

Gyrwyr newydd o 19 Ionawr 2013

O 19 Ionawr 2013, bydd y rheolau newydd canlynol yn gymwys.

Pasio eich prawf gyrru ar gyfer moped ar ôl 19 Ionawr 2013

Yr isafswm oedran ar gyfer defnyddio'r cerbydau hyn fydd 16 oed o hyd, a bydd angen i chi basio'r profion canlynol o hyd:

• hyfforddiant sylfaenol gorfodol (CBT)
• prawf theori
• prawf ymarferol

Unwaith y byddwch wedi pasio eich profion, nodir eich hawl ar eich trwydded yrru fel a ganlyn:

• categori AM (y categori Ewropeaidd)
• categori Q

Os byddwch yn pasio eich prawf car yn gyntaf, byddwch yn cael yr hawl i ddefnyddio mopedau hefyd. Fodd bynnag, bydd angen i chi basio eich CBT er mwyn eu defnyddio ar y ffyrdd (yn yr un modd â'r drefn bresennol). Nodir eich hawl i ddefnyddio mopedau fel yr uchod (categorïau AM a Q).

Categori A1 (beiciau modur bach hyd at 11 kW - 125cc)

Mae categori A1 yn cwmpasu beiciau bach y mae'r canlynol yn gymwys iddynt:

• nid yw'r maint silindr yn fwy na 125cc
• nid yw'r allbwn pŵer yn fwy nag 11kW ac nid yw'r gymhareb pŵer i bwysau yn fwy na 0.1kW fesul kg
• treisiclau modur nad yw eu hallbwn pŵer yn fwy na 15kW

Yr isafswm oedran ar gyfer categori A1 fydd 17 oed o hyd.

Bydd yn rhaid i chi basio'r prawf theori a'r prawf gyrru ymarferol er mwyn gael yr hawl hon.

Categori A2 (beiciau modur canolig hyd at 35kW)

Mae categori A2 yn cwmpasu beiciau maint canolig, gyda cherbyd ochr neu heb gerbyd ochr, y mae'r canlynol yn gymwys iddynt:

• nid yw allbwn pŵer yr injan yn fwy na 35kW
• nid yw'r gymhareb pŵer i bwysau'n fwy na 0.2kW fesul kg - ni chaniateir i'r beic darddu o gerbyd â mwy na dwywaith ei allbwn pŵer ychwaith

Yr isafswm oedran ar gyfer categori A2 fydd 19 oed.

Mae dwy ffordd o gael yr hawl hon.

Mynediad uniongyrchol

Os ydych yn 19 oed neu'n hŷn, gallwch sefyll prawf theori a phrawf ymarferol.

Mynediad fesul cam

Os ydych yn 19 oed neu'n hŷn a bod gennych dwy flynedd o brofiad ar feic modur A1, dim ond prawf ymarferol pellach y bydd angen i chi ei sefyll.

Categori A

Mae categori A yn cwmpasu peiriannau heb gyfyngiad o ran maint na phŵer, gyda cherbyd ochr neu heb gerbyd ochr, a threisiclau modur ag allbwn pŵer sy'n fwy na 15kW. Mae dwy ffordd o gael yr hawl hon.

Mynediad uniongyrchol

Os nad oes gennych ddwy flynedd o brofiad, bydd rhaid i chi fod yn 24 oed neu'n hŷn. Bydd yn rhaid i chi basio'r prawf theori a'r prawf ymarferol hefyd.

Mynediad fesul cam

Gallwch gael y categori hwn pan fyddwch yn 21 oed os oes gennych ddwy flynedd o brofiad ar feic modur A2 a'ch bod yn sefyll y prawf ymarferol.

Treisiclau

Bydd angen i chi ddilyn yr un rheolau os ydych am ddefnyddio treisicl sy'n perthyn i'r categorïau hyn.

Noder mai dim ond i bobl anabl y cynigir profion ar gyfer mopedau â thair neu bedair olwyn, treisiclau A1 a threisiclau A.

Mwy o ddolenni defnyddiol

• Rheolau newydd ar gyfer cerbydau y gallwch eu gyrru a'r isafswm oedrannau