Gwefan llywodraeth y DU

Problemau gyda sŵn yn y gymdogaeth

Os ydych yn cael problem gyda sŵn yn eich cymdogaeth, gall eich cyngor eich helpu. Mae mathau cyffredin o niwsans sŵn yn cynnwys:

• cerddoriaeth uchel
• tafarndai, clybiau neu bartïon uchel
• cŵn sy'n cyfarth, yn nadu neu'n udo'n ddi-baid

Yn achos y rhan fwyaf o fathau o sŵn, yr un yw'r broses o ddatrys y broblem.

Siarad â'r sawl sy'n gyfrifol am y sŵn

Cyn cofrestru cwyn ffurfiol, mae'n syniad da ceisio siarad â phwy bynnag sy'n gyfrifol am y sŵn.

Os yw hyn yn codi ofn arnoch neu os hoffech ychydig o gefnogaeth, mae amrywiaeth o wasanaethau cyfryngu cymunedol ar gael. I gael cyngor ar gael gafael ar y gwasanaethau hyn, gweler 'Datrys anghydfod gyda chymydog: cyflwyniad’.

• Datrys anghydfod gyda chymydog: cyflwyniad

Rhoi gwybod am y niwsans sŵn i'ch cyngor

Os na allwch ddatrys y broblem, cysylltwch â'ch cyngor lleol. Fel arfer, adran iechyd yr amgylchedd fydd yn delio â materion yn ymwneud â sŵn a bydd yn rhoi cyngor ymarferol i chi.

Mae pob cyngor yn ymdrin â chwynion yn wahanol a dylai fod yn gallu rhoi gwybodaeth i chi am ei weithdrefn gwyno.

Mae'n bwysig gwybod y ffeithiau. Cofnodwch o ble y mae'r sŵn yn dod, yr amser y mae'n digwydd a'r rhesymau drosto. Bydd rhai cynghorau lleol yn rhoi taflen cofnodi sŵn i chi nodi'r problemau.

Bydd y ddolen 'Rhoi gwybod am niwsans sŵn' yn mynd â chi i wefan eich awdurdod lleol lle cewch fwy o wybodaeth.

• Rhoi gwybod am niwsans sŵn Opens new window

Sut mae eich cyngor yn delio â phroblemau parhaus yn ymwneud â sŵn

Caiff niwsans sŵn ei asesu ar sail y canlynol:

• p'un a yw'r sŵn yn 'rhesymol', o ystyried yr ardal
• pa mor aml y mae'r sŵn yn digwydd
• faint o bobl y mae'r sŵn yn effeithio arnynt

Gwneir penderfyniadau fesul achos yn seiliedig ar sensitifrwydd person cyffredin.

Hysbysiadau atal

Os bydd eich cyngor yn penderfynu bod y sŵn yn niwsans statudol, mae rhwymedigaeth gyfreithiol arno i roi hysbysiad atal. Mae hysbysiad atal yn nodi'r hyn sy'n ofynnol gan y sawl sy'n achosi'r niwsans. Er enghraifft, os mai cerddoriaeth uchel yw'r broblem, efallai y gofynnir iddo roi'r gorau i wneud y sŵn neu chwarae'r gerddoriaeth ar adegau penodol yn unig.

Gellir gohirio hysbysiad atal mewn perthynas â sŵn am saith diwrnod i roi amser i'r cyngor berswadio'r sawl sy'n achosi'r niwsans i roi'r gorau i wneud y sŵn. Os na fydd hynny'n llwyddo, rhaid cyflwyno hysbysiad atal ar ddiwedd y cyfnod hwn.

Mewn rhai achosion, efallai na fydd angen i'r cyngor brofi niwsans statudol os bydd gan safle drwydded adloniant cyhoeddus. Gall y cyngor gymryd camau yn erbyn safle sy'n gweithredu y tu allan i'w gytundeb trwyddedu.

I gael gwybod beth yw'r diffiniad o 'niwsans statudol' - a chamau eraill y gallwch eu cymryd os mai niwsans statudol ydyw - gweler 'Datrys anghydfod gyda chymydog: cyflwyniad’.

• Datrys anghydfod gyda chymydog: cyflwyniad

Cosbau am beidio â chydymffurfio â hysbysiad atal

Y gosb fwyaf posibl am beidio â chydymffurfio â gorchymyn atal yw £5,000 ar gyfer safleoedd domestig ac £20,000 ar gyfer safleoedd diwydiannol, masnach neu fusnes. Mewn achosion eithriadol, gellir erlyn am ymddygiad gwrthgymdeithasol, os oes gan yr heddlu ddigon o dystiolaeth.

• Ymddygiad gwrthgymdeithasol (adran trosedd a chyfiawnder)

• Rhoi gwybod am ymddygiad gwrthgymdeithasol (adran trosedd a chyfiawnder)

Os na fyddwch yn fodlon ar ymateb eich cyngor

Os na fyddwch yn teimlo bod eich cyngor wedi ymchwilio'n briodol i'ch cwyn yn ymwneud â sŵn, gallwch gysylltu â'r Ombwdsmon Llywodraeth Leol. Dilynwch y ddolen 'Gwneud cwyn yn erbyn cyngor neu awdurdod lleol' am fwy o wybodaeth.

• Gwneud cwyn yn erbyn cyngor neu awdurdod lleol

Os bydd rhywun yn gwneud cwyn yn eich erbyn chi

Os bydd rhywun yn gwneud cwyn yn eich erbyn chi, nid yw'n dilyn o reidrwydd y dyfernir eich bod yn achosi niwsans. Bydd cynghorau'n llunio barn ddiduedd a phroffesiynol ar b'un a ellir ystyried bod y sŵn yn rhesymol o dan yr amgylchiadau. Rhaid ymchwilio i gwynion cyn y gellir gwneud unrhyw benderfyniad.

Sŵn masnachol a sŵn traffig

Caiff llygredd sŵn o safleoedd masnach a busnes (er enghraifft, peiriannau, tafarndai a chlybiau swnllyd) ei drin mewn modd tebyg i sŵn o safleoedd domestig.

Os ydych yn cael problemau gyda sŵn traffig ar y ffordd neu reilffyrdd, efallai y byddwch yn gymwys i gael grant insiwleiddio rhag sŵn gan eich cyngor lleol. Gallwch gael mwy o wybodaeth yn yr adran 'Llygredd sŵn trafnidiaeth'.

• Llygredd sŵn trafnidiaeth (adran teithio a thrafnidiaeth)

Sŵn o safleoedd diwydiannol

Mae Asiantaeth yr Amgylchedd yn rheoleiddio sŵn (yn ogystal ag arogleuon, mwg, golau a phryfed) o ffatrïoedd a safleoedd gwastraff mawr. Rhaid i'r safleoedd hyn gydymffurfio ag amodau sŵn penodol a llunio cynllun rheoli sŵn.

Mae Asiantaeth yr Amgylchedd yn cadw cofnod o unrhyw gynlluniau monitro a rheoli sŵn a gyflwynir gan weithredwyr.

Mae awdurdodau lleol yn rheoleiddio llygredd o bob math arall o ffatri. Gallwch gael mwy o wybodaeth drwy gysylltu â'ch cyngor lleol.

• Cysylltu ag Asiantaeth yr Amgylchedd

• Dod o hyd i'ch cyngor lleol Opens new window

Mapiau sŵn

Ar wefan Noise Mapping England, ceir mapiau rhyngweithiol ar gyfer dinasoedd ac ardaloedd trefol mawr. Gallwch chwilio yn ôl cod post a gweld meysydd awyr. Gallwch hefyd lawrlwytho mapiau ar gyfer y prif gysylltiadau trafnidiaeth rhwng dinasoedd ac ardaloedd trefol mawr.

• Dod o hyd i fap sŵn yn Lloegr Opens new window

Mwy o ddolenni defnyddiol

• Rhoi terfyn ar ymddygiad gwrthgymdeithasol mewn llety a gaiff ei rentu'n breifat

• Cŵn sy'n cyfarth: taflen wybodaeth gan Adran yr Amgylchedd, Bwyd a Materion Gwledig (Defra) Opens new window

Cysylltiadau defnyddiol

• Cysylltiadau y cartref a'r gymuned