Gwefan llywodraeth y DU

Eich hawliau pan fyddwch yn prynu nwyddau neu wasanaethau

Canllaw fideo ar brynu ar-lein

Gwyliwch y canllaw byr hwn ar eich hawliau wrth brynu ar-lein

• Cyngor gan Cyswllt Defnyddwyr (fideo YouTube) Opens new window

Mae'r gyfraith yn rhoi hawliau i chi pan fyddwch yn prynu nwyddau neu wasanaethau heb gyswllt wyneb yn wyneb. Mae'n cwmpasu:

• siopa ar-lein
• siopa drwy'r teledu, ee gan sianeli siopa
• siopa drwy'r post, ee drwy gatalog
• siopa thros y ffôn a ffacs

Dywed y gyfraith:

• rhaid i chi gael gwybodaeth glir am y nwyddau neu'r gwasanaethau cyn i chi eu prynu
• rhaid i chi gael cadarnhad ysgrifenedig o'r wybodaeth hon ar ôl i chi brynu
• fel arfer ceir cyfnod 'ailystyried' lle gallwch ganslo eich archeb am unrhyw reswm
• gallwch gael ad-daliad os na chaiff eitemau eu dosbarthu ar y dyddiad dosbarthu y cytunwyd arno

Os na roddir dyddiad dosbarthu, gallwch gael ad-daliad llawn os na chaiff eitemau eu dosbarthu o fewn 30 diwrnod i gyflwyno eich archeb.

Mae'r rheolau arferol sy'n gymwys i siopa ar y stryd fawr hefyd yn gymwys i werthu o bell. Felly, rhaid i eitemau fod:

• yn unol â'r disgrifiad a roddwyd
• o safon foddhaol
• yn addas at y diben

Mynnwch wybod mwy am yr hawliau siopa hyn drwy ddilyn y ddolen isod.

• Hawliau defnyddwyr - cyflwyniad

Y cyfnod ailystyried a'ch hawl i ganslo

Os byddwch yn prynu rhywbeth heb gyswllt wyneb yn wyneb, fel arfer bydd gennych 'gyfnod ailystyried' o saith diwrnod gwaith. Mae'n eich galluogi i ganslo'r archeb am unrhyw reswm a chael eich arian yn ôl.

Os byddwch yn penderfynu canslo eich archeb o fewn y cyfnod ailystyried, rhaid i chi ddweud wrth y masnachwr yn ysgrifenedig.

Nid oes gennych yr hawl hon i ganslo:

• pan fydd gwasanaeth newydd yn cychwyn ar unwaith (ee talu am fynediad i wefan)
• os bydd yr eitem wedi'i phersonoli neu wedi'i gwneud ar orchymyn penodol
• os bydd yr eitem yn ddarfodus, ee bwyd neu flodau
• papurau newydd neu gylchgronau
• pan fo'r sêl ddiogelwch wedi'i thorri ar CD, DVD neu feddalwedd gyfrifiadurol
• os byddwch yn prynu rhywbeth o arwerthiant ar-lein fel eBay - gelwir hyn yn werthiant preifat

Os byddwch eisoes wedi talu am yr eitemau neu'r gwasanaethau, rhaid i'r masnachwr roi ad-daliad i chi o fewn 30 diwrnod ar ôl i chi ganslo'r cytundeb.

Pan fydd y cyfnod ailystyried yn dechrau

Bydd y cyfnod ailystyried o saith diwrnod gwaith fel arfer yn dechrau ar y diwrnod ar ôl i chi gael y nwyddau.

Ond bydd yn rhaid i'r masnachwr ddweud y canlynol wrthych yn ysgrifenedig:

• eich hawl i gael cyfnod ailystyried
• sut i ganslo eich archeb
• pwy sy'n gyfrifol am ddychwelyd nwyddau
• pwy sy'n gorfod talu'r gost o ddychwelyd nwyddau os byddwch yn canslo yn ystod y cyfnod ailystyried
• gwybodaeth am unrhyw wasanaeth ar ôl gwerthu
• y cyfeiriad i'w ddefnyddio ar gyfer cwynion

Os na fyddwch yn cael y wybodaeth hon, bydd eich cyfnod ailystyried yn ymestyn i uchafswm o dri mis a saith diwrnod gwaith. Er enghraifft, os bydd y masnachwr yn cymryd mis i ddweud wrthych yn ysgrifenedig, byddwch yn cael cyfnod ailystyried o fis a saith diwrnod gwaith.

Os dosberthir yr eitem anghywir i chi neu os bydd yn ddiffygiol

Os anfonir yr eitem anghywir atoch chi neu os bydd yr eitem yn ddiffygiol, gallwch ei dychwelyd a gofyn am eich arian yn ôl. Yn yr achosion hyn, rhaid i'r gwerthwr dalu'r gost o ddychwelyd yr eitemau.

Prynu o dramor

Gall gwerthwyr fod wedi'u lleoli yn unrhyw le yn y byd - hyd yn oed os bydd gan wefan gyfeiriad gwe yn y DU sy'n gorffen gyda '.co.uk'. Os bydd y masnachwr wedi'i leoli y tu allan i'r UE, dylech ddarllen telerau ac amodau'r contract i weld cyfraith pa wlad fydd yn berthnasol.

Dilynwch y ddolen isod i gael gwybod at bwy y dylid cwyno os bydd pethau'n mynd o chwith wrth brynu o dramor.

Prynu'n ddiogel

Ceir gwefannau sgamio sy'n cynnig eitemau i'w gwerthu er mwyn cael eich arian a'ch manylion personol, fel rhif eich cerdyn credyd. Ymhlith sgamiau eraill, mae gwerthwyr yn gwerthu eitemau am brisiau chwyddedig neu gynhyrchion na chânt eu dosbarthu. Dilynwch y dolenni isod i gael gwybod sut i ddiogelu eich hun rhag sgamiau.

• Diogelu eich hun rhag sgamiau

• Bod yn ddiogel ar-lein (adran cartref a chymuned)

Os bydd angen i chi gwyno

Cael cyngor gan Cyswllt Defnyddwyr

I gael cyngor defnyddwyr ymarferol, ffoniwch 08454 04 05 06

• Cysylltu â Cyswllt Defnyddwyr

Os bydd angen i chi gwyno am rywbeth rydych wedi'i brynu, dylech bob amser ddychwelyd at y masnachwr yn gyntaf, ee y wefan neu'r sianel teledu.

Os na fyddwch yn cael ateb gan y gwerthwr neu os na fyddwch yn cytuno â'i ymateb, dylech wneud cwyn ysgrifenedig.

Os byddwch wedi talu gan ddefnyddio credyd (ee cerdyn credyd), gallwch hefyd gwyno i'r cwmni cyllid (gweler y ddolen isod).

Os gwnaethoch dalu drwy ddefnyddio Visa, Mastercard neu Maestro, efallai y gallwch gwyno i'w gynllun 'chargeback'. Bydd yn eich diogelu os bydd problem gyda'r nwyddau neu os bydd y gwerthwr wedi rhoi'r gorau i fasnachu. Bydd angen i chi gysylltu â chwmni'r cerdyn i hawlio.

Os gwnaethoch brynu'r eitem gan bapur newydd cenedlaethol, gallwch gwyno i'r cynllun Diogelu Archebion o Gartref.

Gallwch gael cyngor ar anghydfodau gan Gyswllt Defnyddwyr, y gwasanaeth cyngor i ddefnyddwyr a ariennir gan y llywodraeth.

• Gwneud cwyn - beth i'w wneud yn gyntaf

• Cynllun Diogelu Archebion o Gartref - gwneud hawliad Opens new window

Mwy o ddolenni defnyddiol

• Prynu gwasanaeth - hawliau defnyddwyr

• Dychwelyd eitemau diffygiol