Gwefan llywodraeth y DU

Manteision cadw'n heini

Drwy wneud digon o ymarfer corff, byddwch chi'n sicrhau bod eich cymalau ac organau'ch corff yn gweithio'n effeithiol. Gall ymarfer corff helpu i gadw'ch pwysau'n iach hefyd a'ch gwarchod rhag dal peswch ac annwyd yn rheolaidd.

Byddwch hefyd yn teimlo bod lefel eich egni'n cynyddu a bod eich ymennydd yn gweithio'n well. Mae gwybod eich bod yn edrych ac yn teimlo'n dda hefyd yn gallu rhoi hwb sylweddol i'ch hunanhyder.

Faint o ymarfer corff fydd ei angen arnoch?

Os ydych chi dan 18 oed, dylech geisio gwneud cyfanswm o 60 munud o weithgarwch corfforol bob dydd. Does dim rhaid i chi wneud hynny i gyd ar unwaith, ond mewn pyliau o 10 - 15 munud o leiaf drwy gydol y dydd. Mae hyn yn cynnwys popeth o godi pwysau yn y gampfa i gerdded i fyny'r grisiau yn hytrach na mynd yn y lifft. Y peth pwysig yw bod y gweithgarwch yn cynyddu cyfradd eich calon ac yn gwneud i chi deimlo'n gynhesach.

Os ydych chi dros 18 oed, anelwch at o leiaf 30 munud o ymarfer corff o leiaf bum diwrnod yr wythnos.

Mae'n syniad da rhoi cynnig ar amrywiaeth o weithgareddau corfforol i weld pa rai sydd orau gennych. Ar ôl i chi benderfynu pa fath o ymarfer corff rydych chi'n ei fwynhau, fe allwch gynllunio pa fath o ymarfer corff rydych chi'n bwriadu ei wneud a phryd.

Cyn dechrau

Os ydych chi wedi penderfynu dechrau ar drefn ymarfer, mae'n bwysig mynd i weld eich meddyg i gael archwiliad. Bydd eich meddyg yn gallu'ch cynghori ynghylch faint o ymarfer y dylech chi fod yn ei wneud i ddechrau.

Bydd hefyd yn rhoi gwybod i chi a oes gennych unrhyw gyflwr meddygol megis poen yn eich cefn, a all gyfyngu ar ba fath o ymarfer y byddwch yn ei wneud.

• Archwiliadau, apwyntiadau ac achosion brys

• Cofrestru gyda meddyg teulu a chael triniaeth gan ddeintydd

Ffitrwydd am ddim

Does dim rhaid mynd i'r gampfa i gadw'n heini. Ni fydd rhai mathau o ymarfer corff yn costio dimai i chi, ac fe allwch chi gynnwys y rhan fwyaf ohonyn nhw yn rhan o batrwm eich bywyd prysur.

Dylech ystyried:

• seiclo neu gerdded i'r ysgol, i'r coleg neu i'r gwaith yn hytrach na gyrru neu fynd ar fws
• rhedeg o gwmpas y bloc ychydig o weithiau bob wythnos, gan y gall hyn wella lefel eich ffitrwydd, a byddwch yn rhedeg yn gyflymach ac yn bellach mewn dim o dro
• holi pa gyfleusterau hamdden a ddarperir gan eich awdurdod lleol; mae gan lawer ohonynt gylchoedd pêl-fasged, cyrtiau tennis a chaeau pêl-droed y cewch eu defnyddio am ddim

Chwaraeon tîm

Does dim rhaid i chi gadw'n heini ar eich pen eich hun. Mae chwarae gemau tîm megis pêl-droed, hoci neu bêl-rwyd yn ymarfer corff ardderchog, ond mae'n aml yn fwy o hwyl am eich bod gyda chriw o ffrindiau.

Mae'n bosib y bydd eich ysgol, eich coleg neu'ch prifysgol yn cynnal sesiynau gyda'r nos, neu efallai yr hoffech ymuno â thîm lleol. Mae manylion clybiau lleol i'w gweld ar y we, yn y llyfr ffôn neu yn eich canolfan hamdden agosaf. Gall eich awdurdod lleol hefyd roi gwybodaeth i chi am weithgareddau chwaraeon yn eich ardal.

Os ydych chi'n credu bod angen gwell cyfleusterau chwaraeon yn eich cymdogaeth chi, beth am wneud cais am rywfaint o arian gan y Cronfeydd Ieuenctid?

• Cronfeydd ieuenctid

• Dod o hyd i'ch awdurdod lleol

• Ymweld â gwefan Sport England Opens new window