Gwefan llywodraeth y DU

Defnyddio'r rhyngrwyd

Mae nifer o safleoedd sy'n gadael i chi siarad â phobl eraill ar y we. Mewn 'stafelloedd sgwrsio', cewch gyfle i gael sgwrs gyda phobl eraill a chael ateb yn y fan a'r lle. Mae negesfyrddau a fforymau ar-lein yn rhoi cyfle i chi godi cwestiynau neu wneud sylwadau a gofyn i ddefnyddwyr eraill roi eu barn yn eu hamser eu hunain.

Gall fod yn ffordd wych o sgwrsio gyda phobl eraill sy'n rhannu eich diddordebau, ond dylech wastad fod yn ofalus i beidio â throsglwyddo unrhyw fanylion personol. Dylech wastad gadw mewn cof y ffaith fod defnyddwyr y rhyngrwyd yn gallu smalio bod yn unrhyw un. Fe allan nhw ddweud celwydd am eu hoedran, eu diddordebau ac a ydyn nhw'n wryw neu'n fenyw. Dim ots ers faint rydych chi wedi bod yn sgwrsio, cofiwch mai dieithriaid yw'r rhain o hyd ac nad ydych chi wir yn eu nabod nhw o gwbl.

• Bwlio ar y rhyngrwyd a drwy negeseuon e-bost

• Cael gwybod mwy am seiber-fwlio Opens new window

Safleoedd rhwydweithio cymdeithasol

Efallai bod gan rai ohonoch eich cyfrif Bebo neu broffil Facebook eich hun sy'n gadael i chi sgwrsio gyda ffrindiau neu gyfathrebu gyda defnyddwyr eraill sy'n rhannu'ch diddordebau. Mae'r 'rhwydweithiau cymdeithasol' hyn yn gadael ichi greu eich blog eich hun, llwytho lluniau a fideos i eraill eu gweld, ac ychwanegu pobl at restr ffrindiau ar-lein.

Mae'r rhwydweithiau cymdeithasol yn ffordd wych o gadw mewn cysylltiad ond dylech feddwl yn ofalus cyn ychwanegu rhywun at eich rhestr o ffrindiau ar-lein neu bostio blog a allai eich rhoi mewn helynt yn yr ysgol, y coleg neu'r gwaith. Cofiwch:

• mae eich tudalen yn dal yn fan cyhoeddus, ac felly nid yw'n syniad da rhoi unrhyw beth ar eich tudalen na fyddech yn hoffi i'ch rhieni, eich athrawon neu eich pennaeth yn y gwaith ei weld
• allwch chi fyth fod yn sicr bod defnyddwyr eraill yn dweud y gwir am bwy ydynt ar-lein, felly byddwch yn ofalus am y wybodaeth yr ydych yn ei dangos
• ystyried a ydych yn adnabod rhywun yn ddigon da cyn ei dderbyn i'ch grwp o ffrindiau cysylltiedig
• sicrhau eich bod yn gwybod â phwy i gysylltu os cewch achos o gam-drin neu fwlio ar eich tudalen a sut yr ymdrinnir â'ch cwyn

Os ydych chi'n chwilio am fwy o wybodaeth am gadw rheolaeth ar eich tudalen a sut i gael y gorau o safleoedd rhwydweithio cymdeithasol, cewch yr holl gyngor y bydd ei angen arnoch ar ThinkUKnow.

• Cyngor am rwydweithiau cymdeithasol, blogiau a rhannu ffeiliau gan ThinkUKnow Opens new window

Diogelwch mewn stafell sgwrsio

Peidiwch â rhoi unrhyw wybodaeth bersonol megis eich cyfeiriad neu'ch rhif ffôn wrth ddefnyddio stafell sgwrsio neu roi neges ar fwrdd negeseuon. Dylech wastad ddefnyddio llysenw fel na all neb chwilio am eich enw mewn llyfr ffôn a chael eich rhif ffôn gartref.

Nid yw fel arfer yn beth call trefnu i gyfarfod â rhywun rydych chi wedi bod yn sgwrsio â nhw ar-lein. Cofiwch na fedrwch chi fyth fod yn sicr eu bod yn dweud y gwir am eu hoedran neu eu diddordebau ac y gallech fod yn rhoi eich hun mewn sefyllfa beryglus.

Os dymunwch gyfarfod â rhywun arall rydych chi wedi'u cyfarfod ar-lein, cofiwch drafod hynny gyda'ch rhieni ymlaen llaw. Os byddan nhw'n cytuno, cofiwch drefnu cyfarfod mewn man cyhoeddus ac ewch ag oedolyn gyda chi.

• Darllen am beryglon stafelloedd sgwrsio ar-lein Opens new window

• Gair i gall am aros yn ddiogel ar-lein Opens new window

Manylion personol

Amddiffyn eich hun a'ch cyfrifiadur rhag bygythiadau ar-lein

Mae llawer o bobl dal ddim yn hoffi siopa ar y we oherwydd eu bod yn meddwl nad yw eu manylion banc yn ddiogel. Yn ffodus, mae siopa ar y we erbyn hyn yr un mor ddiogel ag archebu nwyddau dros y ffôn, dim ond i chi ddilyn ambell reol synnwyr cyffredin.

Os byddwch chi'n archebu nwyddau dros y we, cofiwch sicrhau bod y cwmni rydych chi'n prynu ganddo'n defnyddio gweinydd siopa diogel. Byddwch yn gwybod a yw'r safle'n safle diogel os bydd eicon clo yn ymddangos ar waelod ffenestr eich porwr, neu os yw cyfeiriad y we'n dechrau efo 'https:'.

Os nad ydych chi wedi clywed am y cwmni o'r blaen, chwiliwch drwy eu safle am unrhyw rifau cyswllt a chyfeiriadau post. Os ydyn nhw'n gwmni dibynadwy, fydd dim ots ganddyn nhw eich bod yn eu ffonio i ofyn ambell gwestiwn iddyn nhw.

Hefyd, cofiwch beidio ag anfon manylion eich banc at neb mewn neges e-bost. Fydd banciau a siopau ar-lein byth yn gofyn i chi wneud hyn oherwydd nid yw'n ffordd ddiogel o anfon gwybodaeth.

Os byddwch chi'n derbyn e-bost swyddogol yr olwg sy'n gofyn i chi anfon eich manylion ariannol, ddylech chi mo'i ateb byth oherwydd fe allai rhywun ddwyn eich manylion personol.

• Dwyn manylion personol

• Bod yn ddiogel ar-lein - cyngor arbenigol i bawb Opens new window