Gwefan llywodraeth y DU

Dangosir diagramau o’r holl linellau ar 'Marciau ar y ffordd'.

• Download 'Marciau ar y ffordd' (PDF, 160K)

• Cymorth gyda ffeiliau PDF

127

Llinell wen fylchog. Mae hon yn dynodi canol y ffordd. Pan fydd y llinell hon yn ymestyn a’r bylchau’n mynd yn fyrrach, mae’n golygu bod perygl o’ch blaen. Peidiwch â’i chroesi nes eich bod yn gweld bod y ffordd yn glir ymhell o’ch blaen a’ch bod yn dymuno pasio neu droi i ffwrdd.

128

Llinellau gwyn dwbl - mae’r llinell agosaf atoch yn fylchog. Mae hyn yn golygu bod hawl gennych i groesi’r llinellau i basio os yw’n ddiogel, ar yr amod y gallwch gwblhau’r symudiad cyn cyrraedd llinell wen ddi-dor ar eich ochr chi. Mae saethau pwyntio gwynion ar y ffordd yn dynodi bod angen i chi fynd yn ôl i’ch ochr chi o’r ffordd.

129

Llinellau gwyn dwbl - mae’r llinell agosaf atoch yn ddi-dor. RHAID I CHI BEIDIO â’i chroesi na gyrru bob ochr iddi oni bai ei bod yn ddiogel a bod angen i chi fynd i mewn i eiddo neu ffordd ochr gyffiniol. Gallwch groesi’r llinell os oes rhaid, a bod y ffordd yn glir, i basio cerbyd sy’n sefyll yn ei unfan, neu i basio beic pedlo, ceffyl neu gerbyd cynnal a chadw ffyrdd, os ydynt yn teithio ar 10 mya (16 km/awr) neu lai.

[Cyfreithiau RTA 1988 adran 36 a TSRGD rheoliadau 10 a 26]

130

Rhannau o’r ffordd wedi’u peintio â streipiau gwyn lletraws neu linellau onglog. Bwriad y rhain yw gwahanu lonydd traffig neu ddiogelu traffig sy’n troi i’r dde.

• Os ydynt wedi’u hamgylchu â llinell wen fylchog, ni ddylech fynd i’r rhan hon o’r ffordd oni bai bod rhaid ichi a’ch bod yn gallu gweld ei bod yn ddiogel i chi wneud hynny
• Os ydynt wedi’u marcio â llinellau onglog ac wedi’u hamgylchu â llinellau gwyn di-dor RHAID I CHI BEIDIO â mynd i’r rhan hon o’r ffordd ac eithrio mewn argyfwng

[Cyfreithiau MT(E&W)R rheoliadau 5, 9, 10 a 16, MT(S)R rheoliadau 4, 8, 9 a 14, RTA adran 36 a TSRGD 10(1)]

131

Rhaniadau lonydd. Llinellau gwyn byr, bylchog yw’r rhain a defnyddir nhw ar ffyrdd llydan i’w rhannu’n lonydd. Dylech gadw oddi mewn iddynt.

132

Gall stydiau adlewyrchol ar y ffordd gael eu defnyddio gyda llinellau gwynion.

• Mae stydiau gwyn yn dynodi’r lonydd neu ganol y ffordd
• Mae stydiau coch yn dynodi ymyl chwith y ffordd
• Mae stydiau ambr yn dynodi llain ganol ffordd ddeuol neu draffordd
• Mae stydiau gwyrdd yn dynodi ymyl y brif lôn mewn cilfannau a slipffyrdd
• Mae stydiau gwyrdd/melyn yn dynodi addasiadau dros dro i gynllun y lonydd, e.e. os oes gwaith yn cael ei wneud ar y ffordd