Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Dydd Mercher, 3 Hydref 2012

dolenni i dudalennau eraill yn yr adran hon

Pori wrth destun

Pori wrth bobl

Rhieni

Budd-dal Plant

Taliad rheolaidd di-dreth yw'r Budd-dal Plant a roddir i unrhyw un sy'n magu plentyn neu berson ifanc. Fe'i telir i bob plentyn sy'n gymwys ac nid yw eich incwm na'ch cynilion yn effeithio arno, felly gall y rhan fwyaf o bobl sy'n magu plentyn ei gael.

Pwy sy'n gymwys?

Byddwch yn gallu cael Budd-dal Plant os ydych chi'n magu:

plentyn dan 16 oed
person ifanc dan 19 (dan 20 mewn rhai achosion) sydd naill ai'n astudio mewn addysg amser llawn (Lefel A neu gymhwyster cyfatebol) neu raglen hyfforddi gymeradwy
plentyn sy'n 16 neu'n 17 oed sydd wedi gadael addysg bellach amser llawn neu hyfforddiant cymeradwy yn ddiweddar ac wedi cofrestru i weithio neu hyfforddi gyda'r Gwasanaeth Gyrfaoedd neu Connexions neu wasanaeth tebyg.

Faint fyddwch chi'n ei gael?

£18.80 yr wythnos ar gyfer y plentyn hynaf
£12.55 yr wythnos ar gyfer pob plentyn ychwanegol

Yr effaith ar fudd-daliadau neu gredydau eraill

Nid oes 'prawf modd' ar gyfer y Budd-dal Plant (hynny yw, nid yw eich incwm na'ch cynilion yn effeithio arno). Wedi dweud hynny, mae'r Budd-dal Plant yn gallu effeithio ar fudd-daliadau eraill y gallech fod yn eu derbyn sy'n destun prawf modd. Rhai o'r budd-daliadau hynny yw:

Cymhorthdal Incwm
Lwfans Ceisio Gwaith yn seiliedig ar Incwm
Credyd Pensiwn
Budd-dâl Treth Gyngor / Tai
Credyd Cyflogaeth y Fargen Newydd 50+

At ddibenion Credyd Treth, ni chaiff y Budd-dal Plant ei gyfri'n incwm.

Sut i hawlio

Dylech hawlio Budd-dal Plant ar unwaith:

pan gaiff eich plentyn ei eni
pan ddaw plentyn neu berson ifanc i fyw gyda chi
pan fyddwch yn mabwysiadu plentyn
pan fyddwch yn dechrau cyfrannu at gost gofalu am blentyn

I gael Budd-dal Plant, rhaid llenwi ffurflen hawlio a chyflwyno tystysgrif geni neu fabwysiadu'r plentyn neu'r person ifanc. Ni dderbynnir llungopïau.

Os yw eich plentyn newydd ei eni, dylech fod wedi derbyn ffurflen hawlio yn y 'Pecyn Rhodd' a gawsoch gan yr ysbyty. Neu, llenwch ffurflen ar-lein (neu argraffwch un i'w llenwi'n ddiweddarach) ar wefan Cyllid a Thollau EM.

Gwasanaeth ar-lein Budd-daliadau Plant - gwefan Cyllid a Thollau EM Opens new window

Sut mae'n cael ei dalu

Gellir talu'r Budd-dal Plant yn syth i gyfrif banc, cymdeithas adeiladu, Swyddfa'r Post® neu Gynilion Cenedlaethol sy'n derbyn Taliad Uniongyrchol.

Telir y Budd-dal Plant bob pedair wythnos, ond fe ellir ei dalu bob wythnos:

os ydych chi'n rhiant sengl
os ydych chi neu'ch partner neu bartner sifil yn derbyn Cymhorthdal Incwm neu Lwfans Ceisio Gwaith yn seiliedig ar Incwm

Beth i’w wneud os bydd eich amgylchiadau’n newid

Rhaid i chi roi gwybod i'r Swyddfa Budd-dal Plant os bydd eich amgylchiadau'n newid - er enghraifft, os bydd y plentyn rydych chi'n derbyn Budd-dal Plant ar ei gyfer:

yn 16 neu'n 17 oed, wedi gadael addysg bellach amser llawn ac wedi cofrestru i weithio neu hyfforddi gyda'r Gwasanaeth Gyrfaoedd neu Connexions neu wasanaeth tebyg
yn 16 i 19 oed ac wedi gadael addysg bellach amser llawn neu hyfforddiant sydd wedi'i gymeradwyo yn gynt na'r dyddiad a roesoch i'r Swyddfa Budd-dal Plant
ddim yn byw gyda chi mwyach

Gallwch roi gwybod i'r Swyddfa Budd-dal Plant am y newid yn eich amgylchiadau ar-lein, neu gallwch gysylltu â'r Swyddfa Budd-dal Plant drwy ffonio'u llinell gymorth ar 0845 302 1444, ffôn testun 0845 302 1474 (rhwng 8.00 am ac 8.00 pm saith niwrnod yr wythnos).