Gwefan llywodraeth y DU

Pryd y mae angen i chi roi gwybod i Gyllid a Thollau Ei Mawrhydi am ymddiriedolaeth

Dylech ddweud wrth Gyllid a Thollau EM yn syth ar ôl i’r ymddiriedolaeth gael ei chreu os ydych chi’n disgwyl y bydd yr ymddiriedolaeth newydd:

• yn derbyn incwm
• yn gwneud enillion cyfalaf trethadwy (elw) wrth werthu’r asedau – megis cyfranddaliadau, adeiladau neu dir – o fewn y flwyddyn dreth nesaf

Os bydd ymddiriedolaeth sydd eisoes yn bodoli yn dechrau derbyn incwm neu wneud enillion trethadwy, bydd angen i chi roi gwybod i Gyllid a Thollau EM erbyn 5 Hydref ar ôl diwedd y flwyddyn dreth (5 Ebrill).

Os nad yw ymddiriedolaeth yn mynd i gael unrhyw incwm na gwneud unrhyw enillion trethadwy, does dim angen i chi roi gwybod i Gyllid a Thollau EM.

Os byddwch chi’n rhoi gwybod i Gyllid a Thollau EM am ymddiriedolaeth, byddant yn anfon ffurflen SA900 ‘Ffurflen Dreth Ymddiriedolaeth ac Ystad’ atoch - yn fuan ar ôl diwedd y flwyddyn dreth (5 Ebrill).

Cyfrifoldeb pwy yw rhoi gwybod i Gyllid a Thollau EM?

Os oes ymddiriedolaeth wedi cael ei sefydlu a fydd efallai'n derbyn incwm neu'n gwneud enillion trethadwy, yr ymddiriedolwyr sy’n gyfrifol am roi gwybod i Gyllid a Thollau EM.

Ymddiriedolaethau hawl absoliwt yw’r unig eithriad i hyn, lle mae gan y buddiolwr hawl i gael incwm a chyfalaf a fydd yn deillio o’r ymddiriedolaeth. Yn achos ymddiriedolaethau hawl absoliwt, mae'n rhaid i fuddiolwyr yr ymddiriedolaeth ddatgan unrhyw incwm neu enillion cyfalaf ar eu ffurflenni treth personol.

• Ymddiriedolaethau hawl absoliwt

Cael help proffesiynol ar gyfer eich ymddiriedolaeth

Gall fod yn anodd deall ymddiriedolaethau, felly efallai y byddwch am weithio gyda thwrnai neu gynghorydd treth. Ond cofiwch fod gan yr ymddiriedolwr gyfrifoldeb cyfreithiol o hyd dros materion treth yr ymddiriedolaeth. Ceir dolenni i rai sefydliadau proffesiynol isod – ond nid yw'r holl weithwyr proffesiynol wedi cofrestru gyda’r sefydliadau hyn.

Os hoffech i Gyllid a Thollau EM gysylltu â’ch asiant neu’ch cynrychiolydd proffesiynol ynghylch materion Treth Enillion Cyfalaf a Threth Incwm, bydd angen i chi lenwi ffurflen 64-8. Dilynwch y ddolen isod i gael gwybod rhagor am lenwi ffurflen 64-8.

Os hoffech i Gyllid a Thollau EM gysylltu â’ch asiant neu’ch cynrychiolydd proffesiynol ynghylch materion Treth Etifeddu, bydd angen i chi nodi eu manylion ar ffurflen IHT100.

• Dod o hyd i dwrnai – Cymdeithas y Cyfreithwyr Cymru a Lloegr Opens new window

• Dod o hyd i dwrnai – Cymdeithas y Cyfreithwyr Gogledd Iwerddon Opens new window

• Dod o hyd i dwrnai – Cymdeithas y Cyfreithwyr yr Alban Opens new window

• Cael help gan STEP (The Society of Trust and Estate Practitioners) Opens new window

Sut mae rhoi gwybod i Gyllid a Thollau EM

Gallwch roi gwybod i Gyllid a Thollau EM mewn dwy ffordd.

Gallwch ddweud wrthynt fod ymddiriedolaeth wedi cael ei sefydlu drwy lenwi ffurflen 41G (Ymddiriedolaeth) a’i hanfon at Gyllid a Thollau EM. Neu gallwch anfon llythyr atynt. Rhaid i’r llythyr hwn gynnwys yr holl wybodaeth a fyddai wedi cael ei chynnwys ar ffurflen 41G (Ymddiriedolaeth), gan gynnwys:

• enw’r ymddiriedolaeth
• enwau a chyfeiriadau'r holl ymddiriedolwyr
• manylion cyswllt unrhyw asiant proffesiynol, neu rif ffôn ymddiriedolwr os nad oes gennych asiant proffesiynol
• a yw’r ymddiriedolaeth dan reolaeth cyfraith y DU, cyfraith yr Alban ynteu gyfraith gwlad arall
• a yw’r ymddiriedolaeth yn gysylltiedig â chyflogaeth
• a yw’n ymddiriedolaeth ar gyfer buddiolwr agored i niwed
• manylion sut cafodd yr ymddiriedolaeth ei chreu – er enghraifft, gallai hyn gynnwys manylion y person a fu farw os yw'r ymddiriedolaeth wedi'i chreu yn sgil ewyllys, neu fanylion setlwr yn achos ymddiriedolaeth a grëwyd yn ystod ei fywyd
• dyddiad dechrau’r ymddiriedolaeth
• a grëwyd yr ymddiriedolaeth yn sgil Gweithred Wyro neu drefniant teuluol

P’un ai a ydych yn llenwi’r ffurflen ynteu’n anfon llythyr, dylech hefyd roi manylion yr holl asedau yn yr ymddiriedolaeth. Ar gyfer tir neu adeiladau, dylai’r manylion hyn gynnwys y cyfeiriad llawn. Ar gyfer cyfranddaliadau, dylech gynnwys nifer a dosbarth y cyfranddaliadau a rhif cofrestru'r cwmni.

Does dim angen i chi anfon copïau o unrhyw ddogfennau ymddiriedolaeth oni bai y bydd Cyllid a Thollau EM yn gofyn i chi wneud hynny.

• Cysylltu ag Ymddiriedolaethau ac Ystadau Cyllid a Thollau EM

• Ffurflen 41G (Ymddiriedolaeth) Opens new window

Gwybodaeth a gewch ar ôl rhoi gwybod i Gyllid a Thollau EM

Ar ôl rhoi gwybod i Gyllid a Thollau EM, byddwch yn cael Cyfeirnod Trethdalwr Unigryw (UTR) ar gyfer yr ymddiriedolaeth. Mae hwn yn gyfeirnod a roddir pan fyddwch chi'n cofrestru i dalu treth dan Hunanasesu. Bydd angen y cyfeirnod hwn arnoch bob tro y byddwch chi’n cysylltu â Chyllid a Thollau EM.

Byddwch yn cael Ffurflen Dreth Ymddiriedolaeth ac Ystad ar gyfer y flwyddyn dreth gyntaf pan fydd yr ymddiriedolaeth wedi derbyn incwm neu wedi gwneud enillion.

Ni fydd Cyllid a Thollau EM yn anfon Ffurflen Dreth Ymddiriedolaeth ac Ystad atoch yn y dyfodol os bydd un o’r canlynol yn berthnasol:

• mae’r ffurflen dreth ddiweddaraf yn dangos nad yw'r ymddiriedolaeth wedi derbyn incwm nac wedi gwneud enillion trethadwy
• rydych wedi cysylltu â Chyllid a Thollau EM i ddweud wrthynt ei bod yn annhebygol y bydd yr ymddiriedolaeth yn derbyn incwm nac yn gwneud enillion yn y dyfodol agos

Gallwch ddarllen rhagor am hyn yn y canllaw ‘Rhoi gwybod i Gyllid a Thollau EM am ddigwyddiadau a newidiadau mewn ymddiriedolaeth’ drwy ddilyn y ddolen isod.

Os byddwch chi'n cael ffurflen dreth gan eich bod yn ymddiriedolwyr, mae'n ofynnol yn ôl y gyfraith i chi ei llenwi a'i dychwelyd i Gyllid a Thollau EM yn brydlon. Mae hyn yn berthnasol hyd yn oed os nad oes treth yn ddyledus.

• Llenwi'r Ffurflen Dreth Ymddiriedolaeth ac Ystad

• Rhoi gwybod i Gyllid a Thollau EM am ddigwyddiadau a newidiadau mewn ymddiriedolaeth

Rhoi gwybod i adran Treth Etifeddu Cyllid a Thollau EM am eich ymddiriedolaeth

Does dim angen i adran fusnes Cyllid a Thollau EM sy’n delio â Threth Etifeddu gael gwybod pan gaiff ymddiriedolaeth newydd ei sefydlu. Fodd bynnag, mae angen iddynt gael gwybod pan fydd Treth Etifeddu’n ddyledus ar ymddiriedolaeth. Gall hyn fod yn berthnasol:

• pan roddir asedau mewn ymddiriedolaeth

• pan dynnir asedau o ymddiriedolaeth

• pan fydd deng mlynedd ers sefydlu ymddiriedolaeth

• Ymddiriedolaethau a Threth Etifeddu

Pan fo’r ymddiriedolwyr yn preswylio dramor

Os oes gan ymddiriedolaeth ymddiriedolwyr sy'n preswylio dramor, gall fod yn ymddiriedolaeth ‘ddibreswyl’.

• Ymddiriedolaethau dibreswyl

Mwy o ddolenni defnyddiol

• Llenwi ffurflen 64-8 Opens new window

• IHT100 – Cyfrif Treth Etifeddu Opens new window

Cysylltiadau defnyddiol

• Cysylltu ag Ymddiriedolaethau ac Ystadau Cyllid a Thollau EM