Gwefan llywodraeth y DU

Sut mae cardiau debyd yn gweithio

Mae cardiau debyd wedi eu cysylltu'n uniongyrchol â'ch cyfrif banc. Gallwch eu defnyddio i brynu nwyddau neu dynnu arian allan o'ch banc a bydd y swm yn cael ei dynnu o'ch cyfrif yn syth.

Gallwch hefyd ddefnyddio cardiau debyd i gael 'arian yn ôl' o siopau penodol pan fyddwch yn prynu nwyddau a hefyd yn gofyn am arian yn ôl gan yr ariannwr, er nid yw pob siop yn cynnig y gwasanaeth hwn. Bydd y cyfanswm yn cael ei dynnu o'ch cyfrif yn syth.

Pan fyddwch yn defnyddio peiriant twll yn y wal neu'n talu am nwyddau gyda cherdyn debyd bydd angen i chi bwyso eich rhif PIN (rhif adnabod defnyddiwr). Pan fyddwch yn prynu nwyddau byddwch fel arfer yn pwyso'r rhifau ar ddyfais llaw electronig, ond mewn rhai achosion mae'n bosib y bydd angen i chi lofnodi.

Mae'r rhan fwyaf o fanciau yn cynnig cardiau debyd. Mae'r rhan fwyaf o gardiau debyd hefyd yn medru cael eu defnyddio fel 'cardiau gwarantu siec', sy'n gwarantu y bydd eich siec yn cael ei derbyn gan eich banc hyd at swm penodol.

Beth sy'n digwydd os nad oes digon o arian yn fy nghyfrif?

Bydd hyn yn dibynnu ar y math o gerdyn debyd sydd gennych:

Os byddwch yn gordynnu bydd y costau a dalwch yn dibynnu a oes gennych drefniant gorddrafft wedi'i awdurdodi gan eich banc ai peidio. Os oes gennych, byddwch yn talu'r llog ar ddiwedd pob mis. Bydd y swm fel arfer yn llawer llai na'r llog a godir ar gardiau credyd.

Os nad oes gennych gytundeb gorddrafft, neu os byddwch yn mynd dros y terfyn y cytunwyd arno, efallai y bydd eich banc yn gadael i chi wneud y taliad ond byddwch fel arfer yn talu ffioedd llawer uwch nac y byddech pe bai gennych orddrafft wedi'i bennu.

Defnyddio cerdyn debyd dros y ffôn neu ar y rhyngrwyd

Gellir defnyddio cardiau debyd i wneud taliadau dros y ffôn neu ar y we. Yn yr achos hwn bydd angen i chi ddarparu manylion penodol sydd wedi'u printio ar eich cerdyn. Cewch wybod mwy a gweld enghraifft o gerdyn debyd ar wefan yr Awdurdod Gwasanaethau Ariannol.

Sut mae cardiau credyd yn gweithio

Mae cerdyn credyd yn ddull o gael benthyg arian. Rhaid i gwmnïau sy’n benthyg arian i gwsmeriaid fod wedi’u trwyddedu gan Y Swyddfa Masnachu Teg dan Ddeddf Credyd Defnyddwyr 1974. Mae’r Ddeddf yn mynnu bod rhai cytundebau credyd a hur-bwrcas yn cael eu trefnu mewn ffordd benodol ac yn cynnwys gwybodaeth berthnasol am yr unigolyn sy’n cael benthyg arian.

Bydd cardiau credyd yn eich galluogi i 'brynu nwyddau yn awr a thalu eto' - gelwir hyn yn 'brynu ar gredyd'. Nid ydynt yn gysylltiedig â'ch cyfrif banc. Fel cardiau debyd, gellir eu defnyddio i brynu nwyddau mewn siopau dros y ffôn ac ar y we, a rhaid cael yr un manylion. Gallwch hefyd gael 'arian ymlaen llaw' wrth gymryd arian allan o beiriannau twll yn y wal.

Efallai y bydd eich banc yn cynnig cerdyn credyd i chi, neu gallwch wneud cais am un gan unrhyw sefydliad sy'n eu cynnig. Cyn cynnig cerdyn credyd i chi, bydd y darparwr fel rheol yn cynnal archwiliadau er mwyn gweld a ydych wedi cael problemau wrth ad-dalu dyledion (gelwir hyn yn 'archwiliad credyd').

Y risg o ddefnyddio cerdyn credyd

Meddyliwch yn ofalus cyn defnyddio cerdyn credyd. Os na fyddwch yn talu'ch bil yn llawn erbyn y dyddiad a ddangosir bydd rhaid i chi dalu llog ar gyfanswm y bil ar gyfer y mis hwnnw. Gall y cyfraddau llog - a ddangosir gan yr 'APR' (y gyfradd ganrannol flynyddol) - fod yn uchel iawn.

Os tynnwch arian parod allan o'ch cyfrif gyda cherdyn credyd codir llog arnoch o'r eiliad y byddwch yn tynnu'r arian hyd nes bydd bil y cerdyn credyd yn cael ei dalu'n llawn. Mae hon yn ffordd ddrud o fenthyg arian.

Bydd rhai cardiau credyd hefyd yn codi tâl arnoch dim ond am gael y cerdyn.

Os na allwch chi fforddio ad-dalu bil eich cerdyn credyd gallech fynd i ddyled yn hawdd iawn. Cewch wybod rhagor am beth i gadw llygad arno gyda chardiau credyd yn yr erthygl berthnasol a welir isod.

• Dewis a defnyddio cardiau credyd gan y UK Cards Association Opens new window

• Cardiau credyd – gwybodaeth gan y Gwasanaeth Cynghori Ariannol Opens new window

• Pethau i gadw golwg arnynt wrth ddefnyddio cerdyn credyd Opens new window

Mwy o ddolenni defnyddiol

• Gwarchod eich manylion personol ar Moneymadeclear gan yr Awdurdod Gwasanaethau Ariannol Opens new window

• Rheoli dyled

• Adolygu eich sefyllfa ariannol bresennol

• Sefyll prawf dyled rhyngweithiol y Gwasanaeth Cynghori Ariannol Opens new window

• Rheoli'ch arian (adran pobl ifanc)

Cysylltiadau defnyddiol

• Cysylltiadau arian, treth a budd-daliadau