Gwefan llywodraeth y DU

Edrychwch ar eich polisi a chysylltwch â’ch cwmni yswiriant

Mae gwahanol bolisïau yn darparu lefelau gwahanol o yswiriant. Mae’n bosib y cewch newid eitemau sydd wedi eu difrodi gan lifogydd neu gael cymorth proffesiynol i lanhau. Sicrhewch eich bod wedi dod o hyd i’ch dogfennau polisi a'ch bod wedi edrych beth yn union sydd wedi ei yswirio cyn i chi siarad â’ch cwmni yswiriant.

Os ydych chi’n berchen ar eich cartref

Cysylltwch â’ch cwmni yswiriant – dywedwch wrthynt fod llifogydd wedi cyrraedd eich cartref a bod arnoch eisiau hawlio. Os ydych chi wedi symud i lety arall, rhowch eich manylion cyswllt newydd i’r cwmni.

Mae'n bosib fod gennych un polisi yswiriant ar gyfer difrod i strwythur eich cartref, megis waliau, nenfydau a lloriau, a pholisi arall ar gyfer difrod i gynnwys eich cartref (y pethau sy'n berchen i chi). Os oes gennych chi bolisi â dau gwmni yswiriant gwahanol, dylech chi ffonio'r ddau ohonynt.

Os ydych chi’n byw mewn llety sydd wedi’i rentu

Os ydych chi’n rhentu eich cartref, cysylltwch â’ch landlord i sicrhau ei fod wedi cysylltu â’r cwmni sy’n yswirio eich cartref. Bydd angen i chi gysylltu â’ch cwmni yswiriant os oes gennych chi yswiriant ar gynnwys eich cartref. Rhowch wybod iddynt am y llifogydd a dywedwch fod arnoch eisiau hawlio.

Cwestiynau i’w gofyn i'ch cwmni yswiriant

Bydd eich cwmni yswiriant yn anfon ‘aseswr colledion’ (rhywun a fydd yn asesu’r difrod) i’ch cartref. Mae’n bosib na fydd yr aseswr colledion yn medru dod ar unwaith os oes llawer o lifogydd wedi bod yn eich ardal.

Pan fyddwch chi’n ffonio'r cwmni yswiriant, sicrhewch eich bod yn cael gwybod:

• pryd fydd yr aseswr colledion yn medru dod i wneud arolwg o’r difrod
• a fydd y cwmni yn trefnu ac yn talu am lanhau ac ailaddurno eich cartref ai peidio
• pwy fydd eich cyswllt ar gyfer eich hawliad yswiriant gyda’r cwmni

Gwnewch nodyn o’r difrod a wnaed yn sgil llifogydd

Pan fyddwch yn dychwelyd i’ch cartref, bydd angen i chi gofnodi’r difrod a wnaed yn sgil llifogydd fel eich bod yn gallu ei ddangos i’r cwmni yswiriant.

Bydd angen i’r aseswr colledion gael gwybod faint o ddifrod y bu i’r llifogydd ei achosi ar gyfer ei asesiad, felly:

• defnyddiwch ben inc parhaol ynddo i farcio’r lefel uchaf y bu i’r dŵr gyrraedd ar waliau pob ystafell
• tynnwch luniau neu gwnewch fideo o’r difrod a wnaed yn sgil y llifogydd, os yn bosib
• gwnewch restr sy’n disgrifio’r holl ddifrod a wnaed i’ch cartref yn sgil y llifogydd yn fanwl
• os yw eich polisi yn yswirio bwyd sy’n cael ei daflu am ei fod wedi llwydo, neu wedi’i halogi, gwnewch restr o hyn hefyd

Cadwch gofnod o bopeth sy’n berthnasol i’ch hawliad

Dylech chi gadw cofnod manwl o’r holl alwadau ffôn i’ch cwmni yswiriant ac i unrhyw un sy’n glanhau neu’n atgyweirio eich cartref. Bydd hyn o gymorth i chi pan fyddwch yn siarad â’ch cwmni yswiriant ynglŷn â’ch hawliad. Pan fyddwch chi’n gwneud galwadau, sicrhewch eich bod yn nodi:

• pwy y bu i chi siarad â nhw
• y dyddiad a’r amser y bu i chi wneud yr alwad, neu ei chael
• beth y cytunwyd arno

Mae hefyd yn bwysig i chi wneud y canlynol:

• cadw copïau o’r holl lythyrau, negeseuon e-bost a negeseuon ffacs rydych chi’n eu hanfon neu’n eu cael
• cadw derbynebau unrhyw waith atgyweirio brys sydd wedi cael ei wneud, megis trwsio offer trydanol, fel eich bod yn gallu hawlio’r arian yn ôl

Sicrhewch nad ydych chi’n taflu dim byd nes bod y cwmni yswiriant yn dweud wrthych chi am wneud hyn (heblaw bwyd sydd wedi llwydo).

Clirio eich cartref

Dilynwch y ddolen isod i gael gwybod sut i glirio’ch cartref mewn modd diogel ar ôl llifogydd.

• Clirio ar ôl llifogydd