Gwefan llywodraeth y DU

Cadw golwg ar rybuddion llifogydd yn eich ardal chi

Os hoffech gael gwybodaeth am rybuddion llifogydd ar gyfer eich ardal chi dros y ffôn neu drwy ddefnyddio gwasanaethau ar-lein, dilynwch y ddolen isod. Darperir yr wybodaeth hon gan Asiantaeth yr Amgylchedd, sef corff cyhoeddus sy'n gyfrifol am eich helpu i baratoi ar gyfer llifogydd.

• Sut i gael gwybod os oes rhybuddion llifogydd yn eich ardal chi

Codau rhybuddion llifogydd

Os oes rhagolwg o lifogydd yn eich ardal chi, mae Asiantaeth yr Amgylchedd yn defnyddio cyfres o bedwar cod i ddangos pa mor beryglus yw'r sefyllfa. Mae'r codau hyn fel a ganlyn 'llifolwg', 'rhybudd llifogydd', 'rhybudd llifogydd difrifol' a 'rhybudd ar ben' a gellir eu defnyddio mewn unrhyw drefn.

Caiff y pedwar cod llifogydd eu disgrifio'n fwy manwl isod gan gynnwys beth ddylech chi ei wneud ym mhob sefyllfa.

Llifolwg

Llifolwg

Mae'r cod hwn yn golygu y gallwch ddisgwyl llifogydd ar diroedd isel a ffyrdd. Dylech:

• edrych ar newyddion lleol a rhagolygon y tywydd ac ar lefelau dŵr yn eich ardal chi
• fod yn barod i roi unrhyw gynlluniau rydych wedi'u gwneud i ddelio â llifogydd yn eich ardal ar waith

• Paratoi ar gyfer llifogydd

Rhybudd llifogydd

Rhybudd llifogydd

Mae'r cod hwn yn golygu y gallwch ddisgwyl llifogydd mewn cartrefi a busnesau.

Dylech:

• weithredu nawr drwy symud ceir, anifeiliaid, bwyd, eitemau gwerthfawr a dogfennau pwysig i fan diogel
• gosod cyfarpar gwarchod rhag llifogydd
• diffodd eich cyflenwadau nwy, trydan a dŵr os yw'n ddiogel i chi wneud hynny
• bod yn barod i adael eich cartref

Ceisiwch atal unrhyw ddŵr rhag dod i mewn i'ch cartref drwy:

• roi plygiau mewn sinciau a baddonau gan roi pwysau arnynt gyda bagiau tywod, cas gobennydd neu fag plastig wedi'i lenwi â phridd o'r ardd, neu rywbeth trwm

Os nad ydych wedi gosod falfiau sy'n golygu mai dim ond i un cyfeiriad mae dŵr yn gallu mynd (falfiau di-droi-nôl) dylech:

• roi tywelion neu gadachau mewn pibellau a fyddai'n gadael i ddŵr ddod drwyddynt
• datgysylltu unrhyw gyfarpar sy'n defnyddio dŵr (fel peiriant golchi dillad a pheiriant golchi llestri)
  

• Mwy o wybodaeth am gyfarpar gwarchod rhag llifogydd

Rhybudd llifogydd difrifol

Rhybudd llifogydd difrifol

Golyga'r cod hwn y gallwch ddisgwyl llifogydd difrifol a bod bywydau ac eiddo mewn perygl difrifol. Dylech:

• gasglu'r pethau y bydd eu hangen arnoch ar gyfer gadael eich cartref a diffodd y cyflenwadau nwy, trydan a dŵr os yw'n ddiogel i chi wneud hynny
• aros mewn man uchel lle mae modd dianc, osgoi ffynonellau trydan ac osgoi cerdded neu yrru drwy lifogydd
• ffonio 999 ar unwaith os ydych mewn perygl

Os bydd yn rhaid i chi adael eich cartref
Os bydd y gwasanaethau brys yn dweud wrthych am adael eich cartref dylech wneud hynny. Bydd gwrthod gadael ar ôl cael eich cynghori ganddynt yn eich rhoi chi, eich teulu a'r rheini sy'n ceisio eich helpu mewn perygl.

Byddwch yn mynd i ganolfan ar gyfer pobl sydd wedi gadael eu cartrefi dan ofal eich cyngor lleol. Darperir bwyd a dillad gwely am ddim i chi ond dylech ddod â dillad sbâr, meddyginiaeth hanfodol ac eitemau gofal babi gyda chi os oes eu hangen arnoch.

Bydd y rhan fwyaf o ganolfannau fel hyn yn gadael i chi ddod â'ch anifeiliaid gyda chi. Dylech roi cathod ac anifeiliaid bach mewn basgedi cludo anifeiliaid neu focs diogel a dewch â digon o fwyd ar eu cyfer.

Mae'r bobl sy'n rhedeg y canolfannau hyn wedi'u hyfforddi i roi cefnogaeth a chyngor i chi. Byddant yn eich helpu drwy'r straen o ganlyniad i lifogydd ac yn eich paratoi ar gyfer beth i'w wneud wedyn.

Rhybudd ar ben

Rhybudd ar ben

Golyga'r cod hwn nad oes llifolwg na rhybuddion mewn grym yn eich ardal bellach. Dylech wneud y canlynol:

• parhau i wrando ar adroddiadau'r tywydd a pheidio â dychwelyd i adeiladau rydych wedi'u gadael oni bai eich bod wedi cael gwybod ei bod yn ddiogel i chi wneud hynny
• cymryd gofal rhag eitemau miniog a llygredd mewn dŵr llifogydd
• cysylltu â'ch cwmni yswiriant a gofynnwch am eu cyngor cyn dechrau glanhau eich eiddo neu'ch eitemau personol sydd wedi'u difrodi