Gwefan llywodraeth y DU

Cyfryngu

Yn ystod y broses gyfryngu, bydd trydydd parti annibynnol a diduedd yn trafod y materion sy’n peri anghydfod gyda chi a’ch cyflogwr. Weithiau, bydd yn trafod â’r ddau ohonoch ar wahân, ac weithiau gyda’ch gilydd, a’i fwriad fydd helpu’r ddau ohonoch i ddod o hyd i ateb derbyniol.

Mae cyfryngu yn broses wirfoddol, felly mae’n rhaid i chi a’ch cyflogwr ill dau gytuno i fod yn rhan o’r broses. Ni all cyfryngwr orfodi ateb o'i ddewis ei hun – mae'n rhaid i chi a'ch cyflogwr gytuno iddo.

Gellir defnyddio gwasanaeth cyfryngu ar unrhyw adeg yn ystod anghydfod. Gan amlaf, bydd fwyaf effeithiol os defnyddir y gwasanaeth yn fuan ar ôl i'r broblem godi.

Nid yw cyfryngu yn wasanaeth sy’n rhad ac am ddim, er yn gyffredinol y cyflogwr fydd yn talu amdano.

Er y gallai cyfryngu fod yn rhan o drefn gwyno neu ddisgyblu, nid yw’n wasanaeth sy’n cael ei ddefnyddio ar gyfer datrys problemau rhwng gweithwyr a chyflogwyr yn unig. Gallai hefyd fod o gymorth lle ceir anghytuno neu wrthdaro rhwng personoliaethau pobl mewn tîm.

Gallai defnyddio gwasanaeth cyfryngu i geisio datrys problemau eich helpu i osgoi’r straen a’r gost bosib o fynd i Dribiwnlys Cyflogaeth. Mae’r manteision posib eraill yn cynnwys y canlynol:

• cael gwell dealltwriaeth o’r problemau
• dod o hyd i ateb ar eich telerau eich hun
• dod i gytundeb a all gynnwys pethau na fyddai’n cael eu cynnwys mewn dyfarniad gan Dribiwnlys Cyflogaeth (e.e. cael geirda da)

Ni fydd peidio â defnyddio gwasanaeth cyfryngu, neu fethu â dod i gytundeb drwy gyfryngu, yn cael effaith ar eich hawl i wneud hawliad i Dribiwnlys Cyflogaeth.

Cyfryngwyr

Mae gan rai sefydliadau eu cyfryngwyr hyfforddedig mewnol eu hunain. Ceir hefyd ddarparwyr gwasanaethau cyfryngu masnachol.

Yng Nghymru a Lloegr, mae rhai o’r darparwyr gwasanaethau cyfryngu hyn yn aelodau cofrestredig o’r Cyngor Cyfryngu Sifil.

Yn yr Alban, mae rhai o’r darparwyr gwasanaethau cyfryngu wedi’u cofrestru gyda Chofrestr Cyfryngu’r Alban sy’n cael ei rheoli gan Rwydwaith Cyfryngu’r Alban.

Gellir dod o hyd i restr o ddarparwyr gwasanaethau cyfryngu ar gyfer y gweithle ar y gwefannau hyn.

• Y Cyngor Cyfryngu Sifil Opens new window

• Cofrestr Cyfryngu'r Alban Opens new window

Mae’r darparwyr hyn yn datgan eu bod yn bodloni safonau penodol o ran:

• hyfforddi a datblygu ymarfer
• codau ymddygiad
• delio â chwynion ac yswiriant indemnio

Nid yw’r rhain yn rhestri cyflawn o’r holl ddarparwyr ym Mhrydain Fawr sydd o bosib yn cynnig gwasanaethau cyfryngu.

Cymodi

Mae cymodi yn debyg i gyfryngu. Mae’r ddau air yn disgrifio’r un broses, ond defnyddir cymodi fel arfer pan fydd hawliad posibl neu wirioneddol i Dribiwnlys Cyflogaeth, yn hytrach na phroblemau mwy cyffredinol ynghylch cyflogaeth.

• Cymodi mewn anghydfodau yn y gweithle

Gogledd Iwerddon

Mae gan Ogledd Iwerddon wasanaethau cyfryngu ar wahân. Gallwch gael gwybod mwy am y rhain ar wefan nidirect.

• Canllawiau cyflogaeth nidirect Opens new window

Ble i gael cymorth

Mae Acas (y Gwasanaeth Cynghori, Cymodi a Chyflafareddu) yn cynnig cyngor cyfrinachol a diduedd yn rhad ac am ddim ynghylch pob mater sy'n ymwneud â hawliau cyflogaeth.

• Acas Opens new window

Gall eich Canolfan Cyngor Ar Bopeth (CAB) leol ddarparu cyngor diduedd am ddim. Gallwch ddod o hyd i'ch swyddfa CAB leol yn y llyfr ffôn neu ar-lein.

• Dod o hyd i'ch Canolfan Cyngor Ar Bopeth leol Opens new window

Os ydych chi'n aelod o undeb llafur, gallwch gael help, cyngor a chefnogaeth ganddo.

• Mwy am undebau llafur

Efallai y gall twrnai neu asiantaeth gynghori eich helpu i benderfynu ar y llwybr gorau ar eich cyfer.

• Ceisio cyngor cyfreithiol

Mwy o ddolenni defnyddiol

• Sefydliad Siartredig y Cyflafareddwyr Opens new window

• Cyngor i'ch cyflogwr ynghylch delio â materion disgyblu a chwyno gan Business Link Opens new window