Gwefan llywodraeth y DU

Mannau parcio Bathodyn Glas ar strydoedd

Mae'n drosedd parcio cerbyd nad yw'n arddangos bathodyn mewn man parcio Bathodyn Glas ar stryd. Os gwelwch hyn, dylech roi gwybod i warden traffig neu swyddog gorfodi parcio, yr heddlu lleol neu'r cyngor lleol.

Mae gan yr heddlu, wardeiniaid traffig, swyddogion parcio awdurdodau lleol a swyddogion gorfodi sifil hawl i archwilio Bathodynnau Glas.

Mae gwrthod dangos neu fethu dangos bathodyn i'w archwilio, heb esgus rhesymol, yn drosedd. Y ddirwy uchaf ar gyfer y trosedd hwn yw £1,000.

• Cynghorau lleol

Meysydd parcio oddi ar y stryd

Nid yw'r Cynllun Bathodyn Glas yn weithredol mewn meysydd parcio oddi ar y stryd, er enghraifft meysydd parcio archfarchnadoedd.

Ar wahân i feysydd parcio cynghorau lleol, mae'r rhan fwyaf o feysydd parcio yn debygol o fod yn breifat ac yn cael eu rheoli gan y busnesau sy'n berchen arnynt.

Gyda meysydd parcio cynghorau lleol sydd wedi'u lleoli oddi ar y stryd, mae fel arfer yn drosedd parcio mewn man parcio i bobl anabl heb arddangos Bathodyn Glas dilys. Efallai y bydd yn rhaid i yrwyr sy'n camddefnyddio mannau o'r fath dalu 'tâl ychwanegol'.

Gyda meysydd parcio preifat, mae pethau'n wahanol. Mater contract rhwng perchennog y maes parcio a'r modurwr yw'r taliadau a'r amodau sy'n gysylltiedig â defnyddio meysydd parcio oddi ar y stryd. Felly, mater i berchennog neu weithredwr y maes parcio yw gorfodi lleoedd parcio i bobl anabl.

Os ydy modurwr nad yw’n anabl wedi parcio mewn man ar gyfer pobl anabl mewn maes parcio preifat, er enghraifft archfarchnad, gallai un o weithwyr y siop ofyn i'r gyrrwr symud ei gar oddi yno, ond ni all fynnu hynny dan y gyfraith.

Os ydych yn teimlo bod pobl yn parcio'n annheg mewn mannau ar gyfer pobl anabl, siaradwch â rheolwr y siop neu'r maes parcio, neu ysgrifennu atynt.