Gwefan llywodraeth y DU

Cynlluniau talebau

Pwrpas cynlluniau talebau yw gwella'r dewis o gadeiriau olwyn sydd ar gael i chi. Bydd gwasanaethau'n penderfynu'n lleol ynghylch cael cynllun ai peidio, a sut y gweithredir y cynllun hwnnw.

Gyda gwasanaethau sy'n darparu'r cynllun, pan fyddwch yn mynd i glinig ar gyfer cael asesiad o ran cael cadair olwyn, mae'n bosibl y bydd gennych dri opsiwn:

Opsiwn safonol

Byddwch yn cael cadair olwyn am ddim a bydd yn cael ei thrwsio a'i chynnal a'i chadw am ddim.

Opsiwn partneriaeth

Rydych yn dewis cadair olwyn o fath gwahanol i'r un yr aseswyd bod ei hangen arnoch. Fel hyn byddwch yn gallu prynu cadair olwyn o safon uwch na'r math a ddarperir gan Wasanaeth Cadeiriau Olwyn y GIG. Mae'r daleb yn adlewyrchu cost y gadair olwyn a argymhellwyd yn y lle cyntaf, ac rydych chithau wedyn yn talu'r gwahaniaeth yn y gost.

Bydd y gadair olwyn yn cael ei thrwsio a'i chynnal a'i chadw am ddim.

Bydd rhaid ichi ddewis cadair olwyn drwy 'gyflenwr cymeradwy' a fydd yn gorfod bodloni rhai safonau penodol gan gynnwys ansawdd y gwasanaeth.

Opsiwn annibynnol

Mae'r opsiwn hwn yn debyg i'r opsiwn partneriaeth ond chi sy'n berchen ar y gadair olwyn ac yn gyfrifol am ei thrwsio a'i chynnal a'i chadw. Fodd bynnag, bydd y daleb a gewch yn cynnwys swm tuag at amcan gostau trwsio a chynnal a chadw'r gadair dros bum mlynedd.

Ffyrdd eraill o gael cadair olwyn

Y Cynllun Motability

Mae'r Cynllun Motability - a redir gan y mudiad annibynnol di-elw Motability - yn rhoi cyfle i bobl anabl brynu neu logi cadeiriau olwyn neu sgwteri â phŵer am bris fforddiadwy.

Mae’r wefan yn cynnwys cyngor a gwybodaeth drylwyr.

• Cynllun Cadair Olwyn Motability – gwefan Motability Opens new window

Elusennau a mudiadau eraill

Os nad ydych yn gymwys i gael cadair olwyn gan y GIG, neu os dewiswch brynu/llogi cadair olwyn eich hun, bydd gennych sawl opsiwn. Efallai y cewch eich cyfeirio at fudiad gwirfoddol neu elusen megis y Groes Goch ym Mhrydain sy'n aml yn gweithio mewn partneriaeth â Gwasanaethau Cadair Olwyn y GIG.

Mae rhai elusennau a mudiadau, megis Whizz-Kidz a Chymdeithas Plant mewn Cadeiriau Olwyn, yn darparu hyfforddiant sgiliau cadair olwyn.

• Mudiadau ac elusennau sy'n cefnogi pobl ag anableddau corfforol

Cyflogaeth - rhaglen Mynediad at Waith

Mae Mynediad at Waith yn rhoi cefnogaeth a chyngor ymarferol i bobl anabl a’u cyflogwyr fel eich bod yn cael y cymorth angenrheidiol i allu gweithio. Gall hyn gynnwys cyfarpar megis cadeiriau olwyn.

• Mynediad at Waith - cymorth ymarferol yn y gwaith

Cwmnïau masnachol

Mae sawl cwmni'n llogi ac yn gwerthu cynnyrch symudedd - yn aml gyda rhywun yn dod i'ch cartref i ddangos y cynnyrch i chi. Gellir dod o hyd i'r rhain drwy chwilio ar-lein, mewn cylchgronau anabledd neu yn y llyfr ffôn.

Gostyngiad TAW wrth brynu neu logi cadair olwyn

Mae gostyngiad TAW ('cyfradd sero') ar gynnyrch a gwasanaethau i bobl anabl yn cynnwys cadeiriau olwyn a sgwteri.

• Gostyngiad TAW ar gynhyrchion a gwasanaethau i bobl anabl

Cyngor annibynnol

Os penderfynwch brynu eich cadair olwyn eich hun, gwnewch yn siŵr eich bod yn cael rhywfaint o gyngor ymlaen llaw. Cymerwch eich amser i edrych o gwmpas a rhoi cynnig ar wahanol fodelau - drwy wneud hyn gallwch wneud yn siŵr eich bod yn cael cadair olwyn yr ydych yn teimlo'n gyfforddus â hi.

Mae RADAR a'r Sefydliad Byw gydag Anabledd wedi cyhoeddi cyngor defnyddiol iawn, a gallwch lwytho hwn o'u gwefan.

• Canllaw Radar i brynu cadair olwyn neu sgwter pŵer - 'Get Mobile' (yn agor ffenestr newydd) Opens new window

• Taflenni ffeithiau’r Sefydliad Byw gydag Anabledd – gan gynnwys cyngor am gadeiriau olwyn Opens new window