Ynglŷn ag Unistats

Unistats yw'r safle swyddogol sy'n caniatáu i chi chwilio am a chymharu data a gwybodaeth ar gyrsiau mewn prifysgolion a cholegau ledled y DU.  Mae'r safle yn casglu ynghyd gwybodaeth gymharol ar y meysydd hynny mae myfyrwyr yn ystyried i fod yn bwysig wrth wneud penderfyniadau ynglŷn â beth a ble i astudio.  Mae'r eitemau oedd bwysicaf ym marn myfyrwyr wedi cael eu cynnwys mewn Set Gwybodaeth Allweddol (SGA), y gellir eu canfod ar y tab Braslun ar gyfer pob cwrs.

Mae'r safle yn defnyddio'r data swyddogol canlynol ar gyrsiau addysg uwch:

Darparwyd yr wybodaeth hon gan Asiantaeth Ystadegau Addysg Uwch, y Gwasanaeth Data, prifysgolion a cholegau ac Ipsos MORI (Arolwg Cenedlaethol o Fyfyrwyr)

Sut i ddefnyddio Unistats

Gallwch ddefnyddio Unistats i ganfod beth oedd myfyrwyr blaenorol yn ei feddwl am y cwrs, ynghyd â dysgu ynglŷn â'r costau tebygol a'r math o swyddi neu astudiaeth bellach yr aeth myfyrwyr sydd wedi cwblhau'r cwrs ymlaen i wneud. 

Mae'n bwysig cofio pan y byddwch yn defnyddio Unistats fod yr wybodaeth yma wedi ei bwriadu i roddi syniad i chi ynglŷn â pha fath o beth allech chi ei ddisgwyl pe baech yn ymuno â'r cwrs 'rydych yn ei ddewis.  Wrth reswm, bydd y profiad ar bob cwrs yn amrywio ar gyfer pob unigolyn ac o flwyddyn i flwyddyn.

Mae rhywfaint o'r wybodaeth ar Unistats, er enghraifft parthed â boddhad myfyrwyr a chanlyniadau cyflogaeth, yn adlewyrchu'r flwyddyn a aeth heibio - ac mae rhywfaint, megis gwybodaeth ar ffioedd, ar gyfer y flwyddyn academaidd sydd i ddod.  Dylech sicrhau eich bod yn deall i ba flwyddyn mae'r data yn perthyn.

Wrth gymharu data ar gyfer cyrsiau sy'n deillio o'r arolwg, dylid cymryd gofal, yn arbennig pan fo'r gwahaniaethau rhwng cyrsiau'n fach.  I'ch helpu i ddehongli'r data, bydd y safle yn dangos y nifer o bobl a ymatebodd i'r arolwg ar gyfer pob cwrs.  Yn achos rhai cyrsiau, gall y data yma gael ei gasglu at ei gilydd i ddangos canlyniadau arolwg ar gyfer mwy nag un flwyddyn neu fwy nag un cwrs.  Bydd y safle'n nodi ble mae hyn wedi digwydd a bydd yn dangos cyfanswm y rheiny sydd wedi ymateb ar gyer y data sydd wedi cael ei gasglu ynghyd.  Yn gyffredinol, mae'n anhebygol y bydd gwahaniaethau o lai na deg-y-cant rhwng cyrsiau sydd â nifer fach, ond cyffelyb, o bobl wedi ymateb i'r arolwg (e.e. 30) yn arwyddocâol.

Gweler yr adran Pam ei bod yn bosibl nad oes data SGA llawn ar gael am wybodaeth bellach ar sut y caiff data'r arolwg ei gasglu ynghyd ar gyfer cyrsiau sydd â nifer fach o fyfyrwyr, cyrsiau newydd, neu gyrsiau sydd ag ymatebion gan lai na hanner eu myfyrwyr.  Noder os gwelwch yn dda ei bod yn bosibl nad oes yno weithiau unrhyw ddata o gwbl, ond nid yw hyn yn arwydd o ansawdd y cwrs.

Mewn achosion lle mae gwybodaeth wedi cael ei chasglu oddi wrth lai na 53 o fyfyrwyr, mae'r canrannau  a welwch (e.e. ar y gwahanol graffiau a siartiau) ar Unistats wedi eu crynhoi i'r pump-y-cant agosaf.  Er mwyn gweithio allan y canran (i ddangos, e.e. fod 8 allan o 24 o fyfyrwyr wedi cael gradd dosbarth cyntaf) byddem yn rhannu 8 gyda 24, ac yna lluosi gyda 100, sy'n gweithio allan i 33.33% - byddai'r ffigur hwn wedyn yn cael ei grynhoi i 35%.

Yn ôl i ben y dudalen