Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Dydd Mercher, 3 Hydref 2012

Teithio a thrafnidiaeth

Travel and transport

Dogfennau ategol ar gyfer pasbortau cyfunol

I wneud cais am basbort cyfunol mae angen i chi ddarparu dogfennau ategol, yn ogystal â ffurflen gais. Mae dogfennau ategol yn cynnwys ffurflenni caniatâd rhieni wedi'u llofnodi ar gyfer pob plentyn neu unigolyn ifanc a llythyr cefnogi ar gyfer pob cais neu fudiad sy'n gysylltiedig.

Y ffurflen gais

Bydd angen i chi gael ffurflen gais benodol ar gyfer pasbortau cyfunol. Gweler 'Y ffurflen gais ar gyfer pasbortau cyfunol' am fanylion llawn.

Yr Holiadur Cenedligrwydd a'r Ffurflen Caniatâd Rhieni

Mae'r ffurflen hon yn galluogi'r Gwasanaeth Hunaniaeth a Phasbortau i gadarnhau cenedligrwydd pob plentyn ac i wneud yn siŵr ei bod yn iawn iddynt deithio. Rhaid i chi gynnwys ffurflen wedi'i chwblhau'n llawn ar gyfer pob plentyn.

Ceir dwy fersiwn o’r ffurflen:

  • ffurflen CPNQ1 - ar gyfer plant a aned yn y Deyrnas Unedig
  • ffurflen CPNQ2 - ar gyfer plant a aned y tu allan i'r Deyrnas Unedig

Dylech roi copi o'r ffurflen berthnasol i bob plentyn er mwyn i'w rhieni neu'u gofalwyr ei llenwi a'i llofnodi.

Gallwch argraffu copïau o ffurflenni CPNQ1 a CPNQ2.

Pwy gaiff roi caniatâd rhieni?

Os yw rhieni'r plentyn yn briod

Caiff y naill riant neu'r llall lofnodi'r ffurflen.

Os yw rhieni'r plentyn bellach wedi ysgaru

Caiff y naill riant neu’r llall lofnodi’r ffurflen cyn belled â’u bod wedi bod yn briod naill ai:

  • pan aned y plentyn (neu, ar gyfer y rheini sy'n byw yn yr Alban, pan ddaeth y fam yn feichiog)
  • unrhyw adeg ar ôl genedigaeth y plentyn

Fodd bynnag, os mae llys wedi gwneud gorchymyn ynghylch cyfrifoldeb rhiant neu ynghylch rhoi pasbort i'r plentyn, mae hwn yn effeithio ar bwy y gall lofnodi’r ffurflen. Mae’n rhaid anfon unrhyw orchymyn fel hwn gyda'r cais.

Cofiwch, nid yw'r ffaith bod gan un rhiant orchymyn cystodaeth neu gytundeb cynhaliaeth yn golygu bod y rhiant arall yn colli cyfrifoldeb rhiant.

Os nad yw rhieni plentyn yn briod nac erioed wedi bod yn briod â'i gilydd

Caiff y fam lofnodi'r ffurflen.

Dim ond yn yr achosion canlynol y caiff y tad lofnodi'r ffurflen:

  • os oes ganddo gytundeb neu orchymyn cyfrifoldeb rhiant - rhaid anfon y ddogfen hon gyda'r cais
  • os yw ei enw ar y dystysgrif geni (rhaid anfon hon gyda'r cais) ac os cafodd yr enedigaeth ei chofrestru ar y cyd gan y ddau ohonoch ar ôl 15 Ebrill 2002 yng Ngogledd Iwerddon, ar ôl 1 Rhagfyr 2003 yng Nghymru a Lloegr neu ar ôl 4 Mai 2006 yn yr Alban

Nid yw'r Gwasanaeth Hunaniaeth a Phasbortau yn derbyn llungopïau o ddogfennau.

Os yw'r plentyn yn byw gyda gwarcheidwad cyfreithiol

Caiff y gwarcheidwad cyfreithiol lofnodi'r ffurflen.

Os yw'r plentyn yn byw gyda gofalwr maeth

Caiff y gofalwr maeth lofnodi'r ffurflen ond bydd ar y Gwasanaeth Hunaniaeth a Phasbortau hefyd angen llythyr gan Reolwr yr Uned Gwasanaethau Cymdeithasol yn egluro amgylchiadau'r plentyn. Dylai'r llythyr nodi dan pa adran o'r Ddeddf Plant y mae'r plentyn mewn gofal.

Os yw'r plentyn dan ofal y gwasanaethau cymdeithasol

Caiff y gweithiwr cymdeithasol neu reolwr y cartref gofal lofnodi'r ffurflen ond bydd ar y Gwasanaeth Hunaniaeth a Phasbortau hefyd angen llythyr gan Reolwr yr Uned Gwasanaethau Cymdeithasol yn egluro amgylchiadau'r plentyn. Dylai'r llythyr nodi dan pa adran o'r Ddeddf Plant y mae'r plentyn mewn gofal.

Cerdyn-llun pasbort cyfunol

Bydd arnoch angen cerdyn-llun pasbort cyfunol ar gyfer pob plentyn neu unigolyn ifanc sy'n bwriadu teithio ar y pasbort cyfunol.

Gallwch archebu'r cardiau hyn gan Swyddfa Basbort Durham dros e-bost

durhamcollectives@ips.gsi.gov.uk

neu drwy ffonio Llinell Gymorth Pasbortau 24 awr y Gwasanaeth Hunaniaeth a Phasbortau ar 0300 222 0000.

Rhaid llenwi pob cerdyn â manylion y plentyn, yn union fel yr ymddangosant ar y ffurflen gais. Dylid rhoi llun maint pasbort diweddar ar bob cerdyn hefyd.

O ran y lluniau:

  • dylai eu safon fod yn debyg i safon lluniau pasbort safonol
  • ni ddylent fod wedi'u defnyddio o'r blaen ar ddogfen arall
  • ni ddylent fod wedi'u lamineiddio
  • ni ddylent fod yn llungopïau

Gallwch ddefnyddio lluniau digidol neu luniau ysgol unigol ar gyfer pasbort cyfunol ar yr amod eu bod yn bodloni canllawiau'r Gwasanaeth Hunaniaeth a Phasbortau. Allwch chi ddim defnyddio llun ysgol os yw'r gair 'PROOF' wedi'i ysgrifennu arno.

Dylai Arweinydd y Grŵp lenwi eu manylion eu hunain ac ardystio'r cardiau drwy'u llofnodi cyn cyflwyno'r ffurflen gais.

Rhaid i bob plentyn lofnodi eu cerdyn cyn teithio.

Llythyr cefnogi

Ar gyfer pob cais am basbort cyfunol (nid ar gyfer pob unigolyn sy'n teithio), bydd angen i'r Gwasanaeth Hunaniaeth a Phasbortau gael llythyr (ar bapur swyddogol) yn cadarnhau bod y daith wedi'i hawdurdodi a'i bod wedi cael caniatâd. Mae'n ofynnol bod llofnod gwreiddiol ar y llythyr (ni dderbynnir llofnod digidol na llofnod wedi'i lungopïo).

Os yw'ch grŵp yn cynnwys plant o fwy nag un mudiad, bydd ar y Gwasanaeth Hunaniaeth a Phasbortau angen llythyr cefnogi gan bob mudiad. Mae'r ddolen isod yn dangos enghraifft o'r hyn y dylai llythyr cefnogi ei gynnwys.

Ni chaiff Arweinydd na Dirprwy Arweinydd y parti cefnogi'r cais.

Tabl yn dangos pwy ddylai lofnodi/darparu'r llythyr cefnogi

Math o fudiad Pwy ddylai lofnodi
Ysgolion Pennaeth, aelod o fwrdd y llywodraethwyr neu awdurdod addysg pob ysgol sy'n rhan o'r parti
Grwpiau sgowtiaid neu geidiaid Dylid darparu 'Llythyr cyflwyno' neu lythyr cefnogi gan y Comisiynydd Ardal/Sir Cynorthwyol neu gan Bencadlys y Gymdeithas
Clybiau pêl-droed neu rygbi Dylid darparu llythyr gan y gymdeithas bêl-droed leol neu gan gadeirydd neu ysgrifennydd y gynghrair
Clybiau nofio neu judo Dylid darparu llythyr o'r pencadlys cenedlaethol
Cerddorfeydd ieuenctid, corau ac ati Dylid darparu llythyr gan yr awdurdod addysg lleol neu gan y ficer os mai mudiad eglwysig ydynt
Cadetiaid yn y Fyddin neu Awyrlu Dylid darparu llythyr gan y prif swyddog neu gan yr awdurdod gwasanaethau
Clybiau neu clybiau ieuenctid Dylid darparu llythyr gan yr awdurdod lleol y cofrestrwyd ag ef neu gan y pencadlys cenedlaethol
Elusennau cofrestredig Dylid darparu llythyr gan y cyfarwyddwr neu gan unigolyn mewn sefyllfa debyg yn y mudiad

Os fydd grŵp o blant yn mynd dramor i berfformio at unrhyw ddiben (gan gynnwys i gymryd rhan mewn gweithgareddau chwaraeon neu gystadleuaethau), rhaid i'r llythyr cefnogi ddweud:

  • bod holl aelodau'r parti yn amaturiaid
  • na fydd yr aelodau yn derbyn tâl

Y camau nesaf

Os ydych chi'n barod i wneud cais, mae'r Gwasanaeth Hunaniaeth a Phasbortau'n argymell eich bod yn darllen 'Rhestr wirio gan gynnwys ffioedd ar gyfer pasbortau cyfunol'.

Yn yr adran hon...

Additional links

Angen cyngor ar basbortau?

I gael cymorth, ffoniwch Linell Gymorth Pasbortau’r Gwasanaeth Hunaniaeth a Phasbortau ar 0300 222 0000.

Mae’r Llinell Gymorth ar agor:
- rhwng 8.00 am a 8.00 pm o ddydd Llun i ddydd Gwener
- rhwng 9.00 am a 5.30 pm ar benwythnosau a gwyliau cyhoeddus

Ei wneud ar y we

Panel Terfysgoedd yn ceisio barnau

Mae panel annibynnol yn ceisio achosion terfysgoedd mis Awst

Allweddumynediad llywodraeth y DU