Gwefan llywodraeth y DU

Pryd allwch chi ddefnyddio pasbort cyfunol

Mae cytundeb rhyngwladol yn rheoli’r modd y caiff pasbortau cyfunol eu defnyddio.

Dim ond wrth deithio i rai gwledydd yn Ewrop y cewch ddefnyddio pasbort cyfunol. Ni chewch ddefnyddio un wrth deithio y tu allan i Ewrop. Ni fydd y Gwasanaeth Hunaniaeth a Phasbortau (IPS) yn gallu rhoi pasbort cyfunol ar gyfer unrhyw wlad nad yw'n ei dderbyn. Os na ellir rhoi pasbort cyfunol, bydd y Gwasanaeth Hunaniaeth a Phasbortau’n cysylltu ag arweinydd y grŵp sydd wedi’i enwi yn y cais.

Gan fod y rheolau’n gymhleth, mae’r Gwasanaeth yn argymell i bobl ifanc deithio ar eu pasbortau eu hunain pan fydd hynny’n bosib.

Mae IPS wedi cadarnhau y cewch chi, ar hyn o bryd, deithio i’r gwledydd canlynol, neu deithio drwyddynt, ar basbort cyfunol a roddir gan y DU:

• Awstria
• Denmarc
• Ffrainc
• Gwlad Belg
• Gwlad Pwyl
• Lwcsembwrg
• Malta
• Norwy
• Romania
• Sbaen
• Slofenia
• Sweden
• Y Swistir
• Yr Almaen
• Yr Eidal
• Yr Iseldiroedd

Mae IPS wedi cadarnhau na allwch chi deithio i’r gwledydd canlynol, na thrwyddynt, ar basbort cyfunol a roddir gan y DU:

• Bwlgaria
• Estonia
• Hwngari
• Latfia
• Slofacia
• Y Weriniaeth Tsiec

Am gwestiynau ynglŷn â phasbortau cyfunol neu ymweld ag unrhyw wlad arall yn Ewrop, ffoniwch y Llinell Gymorth Pasbortau ar 0300 222 0000.

Ar gyfer pwy mae pasbortau cyfunol

Gellir rhoi pasbort cyfunol i grwpiau cymeradwy o fyfyrwyr, sgowtiaid, geidiaid neu fudiadau ieuenctid eraill sy'n bwriadu teithio dramor gyda'i gilydd. Ni allwch ei ddefnyddio i deithio yn y DU.

Gellir cynnwys rhwng pump a hanner cant o blant a phobl ifanc ar basbort cyfunol. Ar gyfer grŵp mwy (dros 50 o aelodau), dylech wneud cais am ddau neu ragor o basbortau cyfunol a rhannu'r grŵp rhyngddynt.

Rhaid i bawb sydd ar y pasbort cyfunol fod yn iau na 18 oed pan ddaw'r daith sydd wedi'i threfnu i ben. Rhaid iddynt hefyd fod yn ddinasyddion Prydeinig, sy'n golygu un o'r canlynol:

• Dinesydd Prydeinig (cofiwch ei bod yn bosib nad yw plant a aned yn y DU ar 31 Rhagfyr 1982 neu ar ôl hynny yn ddinasyddion Prydeinig)
• Dinesydd yn un o diriogaethau tramor Prydain
• Dinesydd Prydeinig dramor
• Deiliad Prydeinig
• Gwladolyn Prydeinig (dramor)
• Unigolyn wedi'i warchod gan Brydain

Gallwch ddod o hyd i wybodaeth fanylach am bob un o'r grwpiau hyn yn yr adran 'Grwpiau cenedligrwydd sy'n gymwys i gael pasbort Prydeinig'.

Os ydych chi’n ansicr ynghylch cenedligrwydd, neu os ydych chi’n dymuno trafod unrhyw eithriadau i'r uchod, cysylltwch â’r Llinell Gymorth Pasbortau ar 0300 222 0000.

• Grwpiau cenedligrwydd sy'n gymwys i gael pasbort Prydeinig

Arweinyddion grŵp a dirprwy arweinyddion

Mae'n rhaid i bob grŵp enwebu oedolyn yn arweinydd i deithio gyda nhw. Mae IPS hefyd yn argymell bod grwpiau'n enwebu dirprwy arweinydd. Gallai'r person hwn gymryd yr awenau petai'r arweinydd yn sâl, er enghraifft. Os nad oes dirprwy arweinydd wedi'i enwebu, ac nad yw'r arweinydd yn gallu teithio, bydd y pasbort cyfunol yn annilys. Drwy enwebu dirprwy, gall y grŵp osgoi oedi wrth i enw arweinydd newydd gael ei ychwanegu at y pasbort cyfunol.

Rhaid i arweinyddion grŵp a dirprwy arweinyddion fod yn 21 mlwydd oed neu’n hŷn ac mae'n ofynnol bod ganddynt basbort Prydeinig sy’n ddilys am ddeng mlynedd, gan gynnwys dros gyfnod y trip.

Gwneud yn siŵr eich bod yn gwneud cais mewn da bryd

Ymdrinnir â'r holl geisiadau am basbortau cyfunol o'r DU yn Swyddfa IPS yn Durham. Mae'r gwasanaeth hwn yn gweithio i amserlen lem ac mae’n rhaid i chi ganiatáu chwe wythnos o leiaf ar gyfer prosesu cais am basbort cyfunol.

Er bod IPS yn ceisio cwblhau ceisiadau erbyn y dyddiadau teithio, ni all warantu anfon pasbortau cyfunol yn ôl mewn llai na chwe wythnos.

Y camau nesaf - sut mae gwneud cais

Gallwch gael y ffurflen gais a manylion am y dogfennau ategol y bydd eu hangen arnoch yn yr adrannau canlynol:

• 'Y ffurflen gais ar gyfer pasbortau cyfunol'
• 'Dogfennau ategol ar gyfer pasbortau cyfunol'

• Y ffurflen gais ar gyfer pasbortau cyfunol

• Dogfennau ategol ar gyfer pasbortau cyfunol

Cysylltiadau defnyddiol

• Cyngor Teithio’r Swyddfa Dramor

• Gwasanaeth Hunaniaeth a Phasbortau