Gwefan llywodraeth y DU

Oes ewyllys ddilys?

Caiff ewyllys ei derbyn yn ewyllys ddilys:

• os yw wedi'i llofnodi gan yr unigolyn a fu farw a dau dyst
• os oes dyddiad arni
• os yw'n nodi'n glir dymuniadau'r unigolyn a fu farw

Nid oes angen iddi:

• gael ei llunio gan gyfreithiwr nac enwi ysgutor
• gael ei hysgrifennu ar ffurflen ewyllys wedi'i hargraffu

Cysylltu â'r ysgutor neu'r buddiolwyr?

Os oes gennych ewyllys sy'n ymddangos yn ddilys, dylech ysgrifennu at yr ysgutor yn rhoi gwybod iddo am farwolaeth y person ac yn gofyn iddo ymdrin â'r gwaith o weinyddu'r ystad.

Os na chewch ymateb a bod rhywun arall yn cael ei enwi'n fuddiolwr, dylech ysgrifennu ato i esbonio beth sydd wedi digwydd, gan awgrymu y dylai gysylltu â'r Gofrestrfa Brofiant. Pan na chaiff ysgutor ei enwi, dylech ysgrifennu'n uniongyrchol at y buddiolwr.

Lle bo ewyllys ddilys a pherthynas â hawl, yr ewyllys sy'n cael blaenoriaeth.

Efallai nad oes gennych yr ewyllys ond credwch fod un ar gael (efallai oherwydd bod nodyn ymhlith papurau'r unigolyn a fu farw yn awgrymu bod yr ewyllys yn cael ei chadw gan gwmni cyfreithwyr neu fanc). Yn yr achos hwn, dylech ysgrifennu at bwy bynnag a all fod â'r ewyllys, gan ofyn iddo roi manylion marwolaeth y person i'r ysgutor.

Os oes gennych unrhyw asedau neu os oes gennych hawliad yn erbyn yr ystad eich hun, mae'n syniad da gofyn am enw a chyfeiriad yr ysgutor fel y gallwch fwrw ymlaen â'r mater.

Beth os na allwch gysylltu â'r ysgutor neu'r buddiolwyr?

Ni fydd bob amser yn bosibl i chi gysylltu â'r bobl a enwir yn yr ewyllys. Os yw'n hen, er enghraifft, efallai y byddant wedi symud i ffwrdd o'r cyfeiriad a nodir neu wedi marw. Mae pobl yn aml yn gwneud ewyllys yn enwi un person yn ysgutor a'r unig fuddiolwr ac yna'n anghofio creu un newydd os bydd y person hwnnw'n marw.

Yn yr achosion hyn, hyd yn oed os yw'r ewyllys yn gyfreithiol ddilys o bosibl, ni all dymuniadau'r unigolyn a fu farw gael eu gweithredu, felly dylech barhau fel petai nad oes ewyllys o gwbl. Ond os caiff yr ystad ei chyfeirio at Gyfreithiwr y Trysorlys, dylech anfon yr ewyllys i Gyfreithiwr y Trysorlys os oes gennych yr ewyllys.

Cysylltu

Os na fyddwch yn siŵr p'un a ddylid cyfeirio ystad at Gyfreithiwr y Trysorlys ai peidio, neu os bydd angen unrhyw wybodaeth bellach arnoch o ran eiddo heb berchennog (bona vacantia) neu ofynion Cyfreithiwr y Trysorlys, mae croeso i chi gysylltu.

Treasury Solicitor's Office (BV)
One Kemble Street
London
WC2B 4TS

Ffôn. 020 7210 3116/3117
Ffacs. 020 7210 3104

E-bost:

bvinfo@tsol.gsi.gov.uk

Sut i gyfeirio achos at Gyfreithiwr y Trysorlys

Os byddwch yn fodlon bod ystad yn un y dylid ei chyfeirio at Gyfreithiwr y Trysorlys, gallwch naill ai lenwi'r ffurflen gyfeirio gan ddefnyddio'r ddolen i'r ffurflen hysbysu ynghylch unigolyn a fu farw isod neu ei lawrlwytho a'i dychwelyd i'r cyfeiriad uchod.

Anfon papurau ac eitemau gwerthfawr

Pan fyddwch yn anfon papurau ac eitemau gwerthfawr at Gyfreithiwr y Trysorlys, dylech ddilyn y gweithdrefnau isod er diogelwch a chludiant diogel:

• dylid cofrestru pob dogfen werthfawr fel gweithredoedd eiddo a thystysgrifau cyfranddaliadau a'u postio drwy wasanaeth 'recorded delivery'
• dylid torri cardiau credyd/debyd a chardiau siopau cyn eu postio, er mwyn osgoi twyll
• dylid cofrestru paslyfrau banciau neu gymdeithasau adeiladu a'u postio drwy wasanaeth 'recorded delivery'
• peidiwch ag anfon arian parod drwy'r post
• gwnewch sieciau'n daladwy i Gyfreithiwr y Trysorlys, a nodwch gyfeirnod yr achos ac enw'r sawl a fu farw ar gefn y siec
• dylid cadw gemwaith mewn man diogel tan i Gyfreithiwr y Trysorlys anfon cyfarwyddiadau atoch ar sut i gael gwared arno

• Llenwi'r ffurflen hysbysu ynghylch unigolyn a fu farw ar-lein Opens new window

• Download ffurflen hysbysu ynghylch unigolyn a fu farw (PDF, 55K)

• Download ffurflen ynghylch eiddo unigolyn a fu farw (lle y bo eiddo rhydd-ddaliadol neu lesddaliadol yn eiddo i'r sawl a fu farw) (PDF, 43K)

Mwy am gyfeirio ystad at Gyfreithiwr y Trysorlys

• Cyfeirio ystad at Gyfreithiwr y Trysorlys - cyflwyniad

• Cyfeirio Ystad at Gyfreithiwr y Trysorlys: perthnasau â hawl

• Cyfeirio ystad at Gyfreithiwr y Trysorlys: solfedd