Gwefan llywodraeth y DU

• Download y ffeil Windows Media Video (WMV, 50242K)

• Download y ffeil QuickTime (MOV, 82314K)

Gweithio yn y diwydiant manwerthu

Dysgwch fwy am y manteision, pa sgiliau sydd eu hangen arnoch, cyfleoedd swyddi a sut i gael cymorth wrth chwilio am swydd

• Swyddi yn y diwydiant manwerthu

Stephanie Farrell, Tesco: "Roeddwn yn fam sengl i'm merch, Isobel, ac yn byw yn Haydock ar fy mhen fy hun gyda'm merch. Roedd hi'n ddwy oed pan gefais daflen drwy'r drws. Ar y pryd, roeddwn yn eithaf digalon ac unig, a dweud y gwir. Roeddwn yn ceisio dychwelyd i'r gwaith ond yn ei chael hi'n anodd iawn. Pan fyddwch allan o waith am gymaint o amser, mae'n anodd cymryd y cam cyntaf."

Michelle Beardwood, Tesco: "Gan eich bod wedi bod ar fudd-daliadau a'ch bod wedi bod yn ddi-waith ers cyhyd dwi'n meddwl eich bod yn gosod rhwystrau i chi'ch hun."

Janice Ramshaw, Canolfan Byd Gwaith: "Rydym yn cyfweld â chwsmeriaid ac yn nodi eu hanghenion a beth maent am ei wneud, ac mae cynlluniau hyfforddiant penodol y gallwn roi pobl arnynt i ddatblygu'r sgiliau meddal. Sgiliau cyfathrebu da. Felly pan fyddant yn wynebu cyflogwr ac yn gorfod eistedd o'i flaen a chael cyfweliad, bydd ganddynt y sgiliau i gystadlu am y swydd."

Jo Frith, Tesco: "Mae Tesco wedi bod yn cynnal partneriaethau am amser maith. Ond yn ddiweddar, fel y llynedd, gwnaethom gofrestru â Phartneriaeth Cyflogaeth Leol. Yn Haydock gwnaethom roi gwaith i 99 o bobl drwy broses partneriaeth."

Stephanie Farrell: "Wel, dechreuais yn cael hyfforddiant ar y mannau talu. Gwnes hyfforddiant arian yn syth oherwydd fy mod wrth fy modd ag ef. Roeddwn mor frwdfrydig fel bod yn rhaid fy llusgo i ffwrdd i gymryd fy egwyl."

Jo Frith: "Gallant gael cyrsiau ardystiedig nad ydynt wedi eu gwneud o'r blaen. Mae hynny'n rhoi hyder ac ymdeimlad o gyrhaeddiad iddynt o ran beth y maent yn ei wneud."

Michelle Beardwood: "Dwi'n meddwl bob tro rydych yn gwneud rhywbeth gwahanol. Os ydych yn cael yr hyder a bod pobl yn ymddiried ynoch i wneud gwaith ar lawr y siop - fel gwneud gwaith arweinydd tîm pan fydd yn absennol mae'n rhoi ychydig yn fwy o hunan-werth i chi. Felly, yn ogystal â rhoi'r awydd i mi fynd i'r gwaith i weithio, dwi am ddatblygu hefyd."

Lynn Bavage, cwmni manwerthu Skills Smart: "Mae nifer o gyfleoedd i bobl sydd am weithio ym maes manwerthu. Mae'n sector hyblyg iawn. Felly gallwch ddewis yr oriau rydych am eu gweithio i gyd-fynd â'ch bywyd fel y gall y swydd gyd-fynd â'ch ffordd o fyw, a'ch ffordd o fyw gyd-fynd â'r swydd."

Gemma Hughes, cyflogai siop goffi Tilly's: "Roeddwn yn TK Maxx ar absenoldeb mamolaeth. Roeddwn newydd gael mab ac roedd yn ormod o waith i mi. Oherwydd fy mod wedi gweithio mewn siop pysgod a sglodion o'r blaen, a oedd yn brofiad drwg, meddyliais y gallai caffi fod yn wahanol, ac y byddwn yn rhyngweithio â phobl. Credais drwy ddod yma a chael profiad gan bobl a allai wybod mwy na mi, y gallai arwain at gyfleoedd busnes i mi fy hun."

Gillian Quigley, siop goffi Tilly's: "Fel manwerthwr, dwi ddim o reidrwydd yn mynd am gymwysterau. Dwi wedi dysgu o'r gorffennol fod profiad weithiau'n wych, ac yn amlwg mae hwnnw'n rhywbeth y byddwn yn edrych arno. Ond os nad oes neb yn cael y cyfle cyntaf hwnnw sut maen nhw am feddu ar y profiad y mae pawb yn chwilio amdano? Dwi'n chwilio am y gallu i gyfathrebu.Dwi'n chwilio am rywun all gadw amser yn dda.Dwi'n chwilio am rywun dibynadwy y gallaf ymddiried ynddo."

Lynn Bavage: "Mae'r sector manwerthu yn chwilio am bobl ddibynadwy y gellir ymddiried ynddynt ac sy'n dda am weithio gyda phobl eraill. Cyfathrebwyr da sy'n mwynhau gweithio gyda'r cynnyrch, yn y bôn. Pobl sydd yn meithrin perthynas â chwsmeriaid fel eu bod am brynu mwy gennych yn y dyfodol."

Stephanie Farrell: "Mae'n rhaid i unrhyw siop fanwerthu rydych yn mynd iddi ddarparu gwasanaeth cwsmeriaid. Ac mae'n rhaid i chi feddu ar yr hyder i allu gwneud hynny. Os nad ydych yn hyderus, mae pobl eraill yn y siop a fydd yn eich helpu, a bydd siarad â phobl newydd bob dydd yn meithrin eich hyder. Dwi ddim yn credu bod unrhyw sgiliau sydd wirioneddol eu hangen arnoch, gallwch adeiladu ar eich sgiliau. Beth bynnag a wnewch chi, bydd yn rhaid i chi ddatblygu. Felly os nad oes gennych unrhyw beth o gwbl, gallwch fod yn beth bynnag yr hoffech fod yn y siop. Pa siop bynnag ydy honno."

Andrea Francis, y Ganolfan Byd Gwaith: "O ran y sector manwerthu mae gan y rhan fwyaf o'r cwsmeriaid y sgiliau hyn yn barod, ond nid ydynt yn sylweddoli hyn. Mae gan nifer ohonynt sgiliau gwasanaethau cwsmeriaid. Maent wedi arfer cyfathrebu â phobl yn rheolaidd a dyna'r prif beth y mae cyflogwyr manwerthu yn chwilio amdano. Maent am gael pobl a all ddelio â chwsmeriaid mewn ffordd dda. Yn llythrennol, mae'n golygu sylweddoli beth yw eu sgiliau a'u trosglwyddo i'r gweithle."

Lynn Bavage: "Dylai pobl ystyried manwerthu fel gyrfa oherwydd gall rhywun ddatblygu'n gyflym. Mae potensial mawr i ennill arian da. Mae'r cyfleoedd yno os oes gennych yr agwedd gywir a'r gallu cywir a'ch bod yn mynd ati o ddifrif i wneud y gwaith."

Stephanie Farrell: "Gallwn weld fy hun yn datblygu. Gallwn weld fy hun fel arweinydd tîm o fewn chwe mis, ond gwn y byddaf yn arweinydd tîm rywbryd. Yn rheolwr hefyd, gobeithio, a phwy a ŵyr beth nesaf. Rwyf wedi cyflwyno fy opsiynau oherwydd fy mod am fod yn arweinydd tîm y mannau talu. Ers i mi gyflwyno fy opsiynau dwi wedi cael cynnig swydd fel rheolwr ar lawr y siop yn llawn amser, a bellach dwi'n pwyso a mesur y manteision wrth i mi fentro i mewn i gyflogaeth llawn amser. Ond allwn i ddim fod yn hapusach."

Michelle Beardwood: "Dwi'n credu mai'r hyder sydd bwysicaf. Gwnaeth fy hunan-werth gynyddu'n eithriadol. Es i ddim yn rhy fawr i'm 'sgidiau ond mae gwybod eich bod yn rhan o dîm, lle bynnag y bo, yn deimlad gwych. Mae'n dda cael rhywbeth arall i'w wneud yn lle codi yn y bore a glanhau eich tŷ, mynd â'r plant i'r ysgol, glanhau'r tŷ, mynd i nôl y plant a glanhau'r tŷ. Mae gennych rywbeth i'w wneud - mae gennych bwrpas."

Gillian Quigley: "Fy nghyflogeion yw rhan bwysicaf fy musnes. Nhw yw wyneb cyhoeddus fy musnes. Fy nghyngor i yw rhoi cynnig ar y Ganolfan Gwaith. Ewch amdani, gall dalu ar ei ganfed."

Gemma Hughes: "Ewch i'r Ganolfan Gwaith, siaradwch â llu o bobl oherwydd maent wir yn rhoi help i chi. Os cewch gynnig swydd, ewch amdani. Peidiwch â dweud 'na, dwi ddim eisiau gwneud hynny'. Rhowch gynnig arni."

Lynn Bavage: "Fy nghyngor i yw, ewch amdani.Mae'n swydd gyffrous a dwi'n ei mwynhau. Mae pob diwrnod yn wahanol. Byddwch yn gweithio gyda phobl. Byddwch yn gweithio gyda chynnyrch gwahanol a dyma'r swydd orau yn y byd."

Gweithio yn y diwydiant manwerthu

Dysgwch fwy am y manteision, pa sgiliau sydd eu hangen arnoch, cyfleoedd swyddi a sut i gael cymorth wrth chwilio am swydd

• Swyddi yn y diwydiant manwerthu