Gwefan llywodraeth y DU

159

Cyn dechrau symud dylech

• ddefnyddio pob drych i wneud yn siŵr fod y ffordd yn glir
• edrych o’ch cwmpas yn y mannau dall (y mannau hynny nad ydych yn gallu eu gweld yn y drychau)
• rhoi arwydd os oes rhaid cyn symud allan
• edrych yn ôl am y tro olaf

Peidiwch â dechrau symud oni bai ei bod yn ddiogel i wneud hynny.

160

Unwaith i chi ddechrau symud dylech

• gadw i’r chwith, oni bai bod arwyddion neu farciau ar y ffordd yn dynodi fel arall. Yr eithriadau yw pan fyddwch am basio, troi i’r dde neu fynd heibio cerbydau wedi’u parcio neu gerddwyr ar y ffordd
• cadw reit i’r chwith ar gorneli i’r dde. Byddwch yn gallu gweld y ffordd yn well a bydd yn help i osgoi’r risg o wrthdrawiad â thraffig sy’n dod tuag atoch o’r cyfeiriad arall
• gyrru gan gadw eich dwy law ar y llyw lle bo’n bosibl. Bydd hyn yn help i chi gadw rheolaeth lwyr dros eich cerbyd bob amser
• bod yn ymwybodol o ddefnyddwyr eraill y ffordd, yn enwedig beiciau a beiciau modur a all fod yn gwau’u ffordd drwy’r traffig. Mae’r rhain yn fwy anodd eu gweld na cherbydau mwy ac mae’r bobl sy’n ei gyrru yn neilltuol o ddiamddiffyn. Rhowch ddigon o le iddynt, yn enwedig os ydych yn gyrru cerbyd hir neu’n tynnu ôl-gerbyd
• dewis gêr isel cyn i chi gyrraedd llethr hir i lawr rhiw. Bydd hyn yn help i chi reoli eich cyflymder
• cofio, wrth dowio, y bydd yr hyd ychwanegol yn effeithio ar eich gallu i basio a symud. Bydd y pwysau ychwanegol hefyd yn effeithio ar y brecio a’r cyflymu

161

Drychau. Dylech ddefnyddio pob drych yn effeithiol ar hyd eich taith. Dylech

• ddefnyddio’r drychau’n aml fel eich bod yn gwybod bob amser beth sydd y tu ôl i chi ac ar y naill ochr a’r llall i chi
• eu defnyddio mewn da bryd cyn rhoi arwydd neu cyn newid cyfeiriad neu gyflymder
• bod yn ymwybodol nad yw’r drychau’n dangos pob man ac y bydd yna fannau dall. Bydd angen i chi edrych o’ch cwmpas a gwneud yn siŵr

Cofiwch: Drychau - Rhoi Arwydd - Symud