Gwefan llywodraeth y DU

Ar ba oedran y gall plentyn gael prawf llygaid?

Caiff plant eu sgrinio ar gyfer problemau llygaid ychydig wythnosau ar ôl eu geni, ac yna o gwmpas yr adeg y byddant yn dechrau yn yr ysgol yn bedair oed. Os oes gennych unrhyw bryderon rhwng y profion hyn, neu os oes gan aelodau o'ch teulu broblemau gyda'u llygaid, gallwch siarad â'ch meddyg. Gallwch hefyd drefnu i roi prawf llygaid i'ch plentyn gydag optometrydd neu feddyg llygaid.

Faint o amser ddylai prawf golwg ei gymryd?

Gall hyn amrywio. Bydd plant iach yn cymryd tua 20 i 30 munud i gwblhau'r prawf. Os bydd angen cael diferion llygaid ar eich plentyn (er mwyn gwneud y canhwyllau yn fwy a’r llygaid yn haws eu profi) yna dylech adael mwy o amser gan y bydd angen i'r diferion ddechrau gweithio.

Fydd y prawf yr un fath â phrawf llygaid oedolyn?

Caiff plant hŷn eu profi yr un ffordd ag oedolion fel arfer. Ceir profion arbennig ar gyfer plant iau a phlant hŷn nad yw profion oedolion yn addas ar eu cyfer.

A yw profion llygaid plant am ddim?

Mae gan blant dan 16 oed, a myfyrwyr amser llawn dan 19 oed yr hawl i gael profion llygaid am ddim gan y GIG.

Beth os bydd angen sbectol ar fy mhlentyn?

Bydd plant sy'n cael eu profi gan y GIG yn cael taleb i helpu gyda chostau sbectol. Gall plant ddewis o amrywiaeth eang o fframiau, sy'n ymarferol ac yn ffasiynol. Argymhellir lensys plastig ar gyfer plant, gan eu bod yn ysgafnach ac yn fwy diogel na gwydr.

Beth sy'n digwydd os bydd plentyn yn torri neu'n colli ei sbectol?

Mae plant o dan 16 oed yn cael cymorth gan y GIG os bydd eu sbectol yn cael ei golli neu ei difrodi. Gallwch fynd at unrhyw optegydd sy'n rhoi profion llygaid y GIG i gael ffurflen trwsio sbectol neu gael sbectol newydd (GOS 4). Gofynnir i chi roi datganiad o'r hyn ddigwyddodd, a bydd yr optegydd yn rhoi taleb i chi er mwyn eich helpu gyda'r gost. Os byddwch yn mynd at optegydd gwahanol i'r un a rodddodd y sbectol i chi yn y lle cyntaf, bydd angen i chi fynd â chopi o'r presgripsiwn sbectol gwreiddiol gyda chi.

O ran plant 16 oed a hŷn, dim ond os collwyd neu os difrodwyd eu sbectol gan salwch y maent yn gymwys i gael help. Gall eich optegydd roi gwybod i chi sut i gael help.

Ydy plant yn gallu gwisgo lensys cyffwrdd?

Gellir rhoi lensys cyffwrdd i blant a gall eich optometrydd roi cyngor i chi ar hyn. Penderfyniad y plentyn yw gwisgo'r lensys cyffwrdd ai peidio, a dim ond os bydd y plentyn yn dewis eu cael y bydd yr optometrydd yn eu rhoi iddo. Mae'n rhaid i'r plant hefyd allu rhoi'r lensys yn y llygaid a'u tynnu allan eu hunain, ac mae'n rhaid iddynt ddeall yn llwyr pa mor angenrheidiol yw gofalu amdanynt yn iawn.