Gwefan llywodraeth y DU

Beth allai addysg uwch ei wneud i'm plentyn?

Mae addysg uwch yn golygu mynd ag addysg eich plentyn i'r lefel nesaf a chyflawni ei botensial. Yn ogystal â chreu cyfleoedd gyrfa newydd, mae addysg uwch yn golygu cyfleoedd i gwrdd â phobl newydd a chymryd rhan mewn amrywiaeth eang o weithgareddau cymdeithasol a chwaraeon.

Gall hefyd helpu i ddatblygu ymdeimlad o annibyniaeth - heb bwysau gwaith amser llawn yn syth.

• Manteision addysg uwch (adran addysg a dysgu)

Addysg uwch a rhagolygon gyrfa

Mae mwy a mwy o gyflogwyr yn chwilio am weithwyr sgilgar ac addysgedig. Gall cymhwyster addysg uwch arwain eich plentyn at amrywiaeth o ddewisiadau gyrfa cyffrous.

Ac ar gyfartaledd, mae graddedigion yn tueddu i ennill cryn dipyn yn fwy na phobl sydd wedi cael Safon Uwch ond heb fod mewn prifysgol. Dros gyfnod o oes rhywun ym myd gwaith, mae’r gwahaniaeth yn rhywbeth fel £100,000 cyn treth, yn ôl ffigurau heddiw.

• Addysg uwch a'ch gyrfa (adran addysg a dysgu)

A yw addysg uwch yn addas i'm plentyn?

Mae mynd i'r brifysgol neu'r coleg yn ddewis i bawb sydd â'r gallu i lwyddo mewn addysg uwch.

Ar un adeg, roedd mynd i'r brifysgol yn cael ei ystyried yn rhywbeth ar gyfer y rheini o deuluoedd mwy cyfoethog, ond nid yw hyn yn wir bellach. Mae mwy o bobl yn mynd i addysg uwch nag erioed o'r blaen - gan gynnwys myfyrwyr o bob cefndir, ac o bob oed.

Mae mwy o ffyrdd o gael eich troed i mewn nag erioed o'r blaen. Gall cymwysterau NVQ, BTEC neu gymwysterau eraill sy'n gysylltiedig â gwaith - ac, yn y dyfodol, y Diploma 14-19 - fod yn llwybr i addysg uwch, yn ogystal â'r cymwysterau Safon Uwch traddodiadol.

Felly hyd yn oed os nad oes unrhyw un arall o'ch teulu wedi bod yn y brifysgol, does dim rheswm pam na all eich plentyn fynd.

• Mynd i brifysgol ac addysg uwch (adran addysg a dysgu)

Beth all fy mhlentyn ei astudio?

Mae amrywiaeth eang o gyrsiau ar gael, o hanes yr henfyd i reolaeth ym maes lletygarwch i nyrsio milfeddygol.

Mae'n bwysig bod eich plentyn yn astudio pynciau y mae'n eu mwynhau, ond os yw'n bwriadu mynd i'r coleg neu'r brifysgol, dylai edrych i weld pa bynciau fydd eu hangen arno i ddilyn y cwrs yr hoffai ei ddilyn.

Er enghraifft, os oes ganddo ddiddordeb mewn cwrs neu yrfa ym maes gwyddoniaeth mae'n bosibl y bydd angen TGAU, Safon Uwch neu gymwysterau cyfatebol mewn pynciau gwyddoniaeth arno.

• Pa ffordd nawr? Blynyddoedd 10-11 (adran addysg a dysgu)

• Chi biau'r dewis: dewisiadau ar ôl 16 oed (adran addysg a dysgu)

• Dod o hyd i gwrs mewn prifysgol neu goleg (adran addysg a dysgu)

Pa gymorth ariannol sydd ar gael?

Mae llawer o rieni yn poeni sut gall eu plentyn dalu am addysg uwch, ond mae digon o gymorth ariannol ar gael. Defnyddiwch y dolenni isod i gael gwybod pa gymorth sydd ar gael a beth fydd yn rhaid i rieni a phartneriaid ei wneud fel rhan o gais am gyllid myfyrwyr.

• Cyllid Myfyrwyr Cymru Opens new window

A oes yn rhaid i'm plentyn symud oddi cartref?

Ddim o reidrwydd: mae llawer o golegau lleol yn cynnig cyrsiau addysg uwch erbyn hyn. Mae llawer o bobl yn aros gartref tra'u bod yn astudio, a gall fod yn gyfleus - ac yn rhatach hefyd.

Ar y llaw arall, mae symud i ffwrdd yn golygu mwy o ddewis o gyrsiau - a gall helpu i ddatblygu ymdeimlad o annibyniaeth.

• Dewis coleg neu brifysgol (adran addysg a dysgu)

Beth yw'r dewisiadau wrth gymryd blwyddyn fwlch?

Mae blynyddoedd bwlch yn dod yn fwy a mwy poblogaidd, a gall cymryd seibiant o astudio helpu i ehangu profiad eich plentyn.

Os yw eich plentyn am gymryd blwyddyn fwlch, anogwch ef/hi i wneud cynlluniau fel y gall fanteisio i'r eithaf ar y flwyddyn honno. Dylai hefyd sicrhau bod y colegau a'r prifysgolion y mae'n gwneud cais amdanynt yn derbyn cais am fynediad wedi’i ohirio.

• Trefnu blwyddyn fwlch (adran pobl ifanc)

Ble gallaf gael mwy o wybodaeth am addysg uwch?

Mae gan 'Helpu eich plentyn i addysg uwch', canllaw Aimhigher i rieni, fwy o wybodaeth am addysg uwch - gan gynnwys pa fudd all eich plentyn ei gael o addysg uwch, sut y gall fynd i brifysgol neu goleg a sut beth yw bywyd myfyriwr.

Gallwch lwytho copi oddi ar y we isod, neu archebu un drwy:

• ffôn: 0845 015 0010
• ffôn testun: 0845 015 0030

Nodwch y cyfeirnod 'URN 09/1159'. Mae fersiwn sain ar gael hefyd (nodwch 'URN 09/1336').

• Download ‘Helpu eich plentyn i addysg uwch’ oddi ar y we (PDF, 937K)

• Cymorth gyda ffeiliau PDF

Ble gall fy mhlentyn gael cyngor?

Gellir cael cyngor gan athrawon neu ddarlithwyr a chan gynghorwyr gyrfa yn yr ysgol neu gan y Llinell Gymorth i Bobl Ifanc. Ewch i 'Lle i fynd, beth i'w astudio' i gael arweiniad ar sut i gael rhagor o wybodaeth am brifysgolion, colegau a chyrsiau.

• Cysylltu â’r Llinell Gymorth i Bobl Ifanc

• Lle i fynd, beth i'w astudio (adran addysg a dysgu)

Cysylltiadau defnyddiol

• Cysylltiadau rhieni