Gwefan llywodraeth y DU

Ambell Awgrym: cadw'n ddiogel rhag lladrad

Os oes yn rhaid i chi gerdded eich hun yn ystod y nos, cymerwch fwy o ofal nag arfer. Arhoswch ar lonydd goleuedig a chymharol brysur.

I aros yn ddiogel, gallwch hefyd wneud y canlynol:

• trefnu eich llwybr ymlaen llaw
• osgoi llwybrau byr drwy strydoedd cefn neu barciau neu dir comin oni bai eu bod wedi'u goleuo'n dda
• os ydych chi'n cario bag, ceisiwch sicrhau bod y strap yn mynd o'ch cwmpas yn hytrach na dros eich braich, a chadwch eich llaw dros y darn sy'n cau
• byddwch yn ymwybodol ac yn effro i'r hyn sy'n digwydd o'ch cwmpas
• cymerwch ofal gyda'ch offer electronig; bydd siarad ar eich ffôn symudol, gwrando ar eich chwaraewr MP3 neu gario bag gliniadur yn dangos i ladron bod gennych rywbeth gwerth ei ddwyn
• peidiwch â chario dogfennau pwysig na chardiau credyd nad oes mo'u hangen arnoch
• dylech osgoi defnyddio peiriannau codi arian yn y nos
• peidiwch â thynnu eich pwrs neu'ch waled allan nes bod angen
• os ydych chi'n credu bod rhywun yn eich dilyn, croeswch y ffordd neu ewch i siop ac arhoswch yno nes byddwch yn sicr eich bod yn ddiogel

Bod yn ddiogel ar drafnidiaeth gyhoeddus

Os ydych chi'n teithio ar eich pen eich hun ac yn gwybod sut mae cyrraedd adref, mae defnyddio trafnidiaeth gyhoeddus yn fwy diogel na cherdded. Fodd bynnag, dylech barhau i ddefnyddio synnwyr cyffredin i ddiogelu eich hun.

Os ydych chi'n aros am fws neu drên, sefwch mewn man goleuedig wrth ymyl pobl eraill. Pan fyddwch ar y bws neu'r trên, ceisiwch eistedd wrth ymyl pobl eraill a gwnewch yn siŵr eich bod yn gwybod lle mae'r larymau mewn argyfwng.

Peidiwch â bod ofn symud i sedd neu i gerbyd arall os nad ydych yn teimlo'n ddiogel, hyd yn oed os yw hynny'n ymddangos yn ddigywilydd.

• Gwybodaeth am droseddu a thrafnidiaeth gyhoeddus gan yr Adran Drafnidiaeth Opens new window

Bod yn ofalus wrth godi arian o beiriant

Dewiswch beiriant codi arian sydd mewn lle goleuedig mewn man y gellir ei weld o'r ffordd neu o dai cyfagos. Yn ddelfrydol, dylech godi arian o beiriannau sydd mewn busnesau, megis banciau neu gymdeithasau adeiladu.

Byddwch yn effro a chadwch lygad ar y bobl o'ch cwmpas - os oes rhywun amheus yr olwg yn aros gerllaw, chwiliwch am beiriant arall.

Peidiwch â gadael i bobl nad ydych yn eu hadnabod sy'n ceisio siarad â chi dynnu eich sylw pan fyddwch yn codi arian o'r peiriant.

Pan fyddwch yn codi arian, byddwch yn ymwybodol o'r hyn sy'n digwydd o'ch cwmpas. Cadwch lygad ar y bobl o'ch cwmpas. Ydyn nhw'n ddigon pell oddi wrthych? Os ydyn nhw'n rhy agos, mae'n well i chi ganslo'r hyn rydych yn ei wneud a pheidio â chodi arian.

Estynnwch eich cerdyn yn barod cyn i chi gerdded at y peiriant codi arian. Gwnewch yn siŵr na all neb ddarllen eich rhif PIN pan fyddwch yn pwyso'r botymau, a chadwch eich arian ar unwaith.

Cadw eich ffôn symudol yn ddiogel

Yr eitemau mwyaf cyffredin i gael eu dwyn mewn lladrad yw ffonau symudol, felly gwnewch yn siŵr eich bod yn cadw eich ffôn yn ddiogel.

Os nad ydych chi'n ffonio rhywun, gwnewch yn siŵr bod y ffôn o'r golwg. Cadwch ef yn un o'ch pocedi blaen, neu mewn bag. Peidiwch â rhoi'r ffôn yn sownd wrth eich belt neu ei hongian o gwmpas eich gwddf.

Cofrestrwch eich ffôn

Mae gan bob un o'r prif rwydweithiau ffôn symudol systemau ar waith i wneud yn siŵr bod ffonau symudol yn cael eu blocio o fewn 48 awr, fel nad ydynt yn dda i ddim.

Dylech gofrestru eich ffôn gyda'ch darparwr rhwydwaith fel y gallant ei flocio'n gyflym os yw'n mynd ar goll neu'n cael ei ddwyn. Gallwch hefyd gofrestru eich ffôn symudol ar y Gofrestr Ffonau Symudol Genedlaethol drwy ddefnyddio'r ddolen isod.

Holwch eich cwmni ffôn symudol i gael mwy o wybodaeth am sut i ddiogelu eich ffôn.

• Y Gofrestr Ffonau Symudol Genedlaethol Opens new window

Riportio trosedd

Os oes rhywun wedi dwyn rhywbeth gennych neu wedi ceisio gwneud hynny, riportiwch y trosedd ar unwaith. Ffoniwch 999 cyn gynted ag y mae'n ddiogel gwneud hynny, naill ai o'ch ffôn symudol, o flwch ffôn neu o siop neu fusnes cyfagos.

Bydd plismon neu aelod o staff yr heddlu yn gofyn i chi ddisgrifio beth ddigwyddodd a dweud lle rydych chi. Byddant yn gofyn a ydych wedi brifo, ac os ydych chi, byddant yn anfon ambiwlans i'ch helpu.

Cofiwch y gall rhoi disgrifiad mor fanwl â phosib o'r lleidr gynorthwyo'r heddlu i ymchwilio i'r trosedd.

• Riportio trosedd

• Help a chymorth i ddioddefwyr troseddau