Gwefan llywodraeth y DU

Help i gyfuno gwaith a gofalu

Mae Cefnogaeth sy'n Canolbwyntio ar Waith ar gyfer Gofalwyr yn darparu help a chyngor er mwyn i chi allu symud yn llwyddiannus i waith.

Hyd yn oed os nad ydych chi'n teimlo eich bod yn barod i weithio nawr ond efallai yr hoffech chi weithio yn y dyfodol, gallwch fanteisio ar Gefnogaeth sy'n Canolbwyntio ar Waith ar gyfer Gofalwyr. Mae'n wasanaeth gwirfoddol y gallwch ddewis cymryd rhan ynddo unrhyw bryd. Gallwch hefyd roi'r gorau i gymryd rhan unrhyw bryd.

Byddwch yn cael help a chymorth gan gynghorydd personol o'r Ganolfan Byd Gwaith. Gall hyn gynnwys:

• help i baratoi am waith
• help i ddod o hyd i hyfforddiant addas
• cefnogaeth i chwilio am swydd a gwneud cais am swydd

Gofal amgen

Byddwch hefyd yn cael cyngor ar ddod o hyd i ofal amgen wrth i chi fynychu apwyntiadau gyda'r cynghorydd personol, cymryd rhan mewn cyrsiau hyfforddi neu fynd i gyfweliadau swydd.

Nid oes angen i chi fod yn cymryd rhan mewn Cefnogaeth sy'n Canolbwyntio ar Waith ar gyfer Gofalwyr i allu cael gafael ar gyllid ar gyfer gofal amgen.

Pwy sy’n gymwys

Mae Cefnogaeth sy'n Canolbwyntio ar Waith ar gael i ofalwyr:

• nad ydynt yn gweithio neu sy'n gweithio llai na 16 awr yr wythnos
• sy'n 18 oed neu'n hŷn
• nad ydynt yn gallu cael dim help gan unrhyw un arall o raglenni cefnogi cyflogaeth y Ganolfan Byd Gwaith megis y Fargen Newydd neu Lwybrau at Waith.

Sut gall gweithio effeithio ar eich budd-daliadau

Bydd eich cynghorydd personol yn gallu dweud wrthych chi am sut y gallai dechrau gweithio effeithio ar eich budd-daliadau. Byddant hefyd yn eich helpu i wneud cais am unrhyw fudd-daliadau neu gredydau treth y gallech fod yn gymwys i'w cael pan fyddwch chi'n dechrau gweithio.

Mwy am Gefnogaeth sy'n Canolbwyntio ar Waith ar gyfer Gofalwyr

I gael gwybod mwy am Gefnogaeth sy'n Canolbwyntio ar Waith ar gyfer Gofalwyr, cysylltwch â'ch swyddfa Canolfan Byd Gwaith leol.

• Cysylltu â'ch swyddfa Canolfan Byd Gwaith leol Opens new window