Gwefan llywodraeth y DU

Dewis y ffordd gywir o gynilo

Os oes arnoch eisiau arbed eich arian, mae sawl gwahanol ffordd y gallwch wneud hynny. Er mwyn dod o hyd i gyfrif a fydd yn gweddu i chi ac sy'n ffordd o wneud yn fawr o'ch arian, bydd angen i chi feddwl am nifer o bethau, megis:

• pa mor hen mae'n rhaid i chi fod i agor y cyfrif
• faint o arian y bydd ei angen arnoch er mwyn agor y cyfrif
• faint o log gewch chi ar eich arian
• faint o arian y gallwch fforddio ei roi mewn cyfrif cynilo
• a gewch chi wneud taliadau rheolaidd ynteu dim ond pan fydd gennych arian dros ben
• a fyddwch chi'n colli'r cyfle i gael bonysau neu logau wrth dynnu arian allan o'r cyfrif
• faint mae arnoch chi eisiau ei gynilo ac am ba mor hir yr hoffech wneud hynny cyn defnyddio'r arian
• a gewch chi dynnu eich arian allan ohonynt yn syth, neu os bydd rhaid i chi roi rhybudd cyn i chi allu cymryd unrhyw arian allan o’r cyfrif
  

Cyfrifon cynilo ar y stryd fawr

Mae'r rhan fwyaf o fanciau a chymdeithasau adeiladu yn cynnig amrywiaeth o gyfrifon cynilo, gan gynnwys cyfrifon ar-lein. Er mwyn gwneud yn fawr o'ch arian, bydd angen i chi feddwl faint mae arnoch eisiau ei gynilo ac am ba hyd y gallwch gynilo cyn defnyddio'r arian.

Gallai fod yn ddefnyddiol i chi gael cyfrif cynilo yn yr un banc neu gymdeithas adeiladu â'ch cyfrif cyfredol - gallech wedyn reoli'ch treuliau o ddydd i ddydd drwy'ch cyfrif cyfredol a symud unrhyw arian ychwanegol yn sydyn i'ch cyfrif cynilo.

Ond cofiwch y gallech ddod o hyd i well cyfrif cynilo yn rhywle arall. Gallai cael arian mewn dau wahanol le fod yn llai hwylus, ond mae bancio ar y we a dros y ffôn yn gwneud symud eich arian rhwng gwahanol gyfrifon yn hawdd iawn.

• Gweld y gwahanol fathau o gynnyrch cynilo sydd ar gael Opens new window

Cynilion a Buddsoddiadau Cenedlaethol

Cynilion a Buddsoddiadau Cenedlaethol (NS&I) yw'r amrywiaeth o gyfrifon cynilo a gynigir gan y llywodraeth i bobl sy'n cynilo. Dyma un o'r ffyrdd mwyaf diogel o gynilo'ch arian.

Os oes arnoch eisiau agor cyfrif gyda Cynilion a Buddsoddiadau Cenedlaethol, meddyliwch am ba mor hir yr ydych yn dymuno buddsoddi. Edrychwch ar yr holl gyfrifon y gallwch wneud cais amdanynt a phenderfynu p'run yw'r gorau i chi.

• Cynilion a Buddsoddiadau Cenedlaethol Opens new window

Cyfrifon Cynilo Unigol (ISAs)

Os ydych dros 16 oed ac yn dymuno ennill llog ar eich arian heb i dreth gael ei thynnu, gallai ISA arian fod yn ddewis da.

Gallwch dalu arian i mewn i ISA mor aml ag y dymunwch, cyn belled nad yw'r cyfanswm y byddwch yn ei dalu i'r cyfrif o fewn blwyddyn dros £3,600.

Maent yn ddelfrydol os ydych yn bwriadu mynd i deithio yn ystod y flwyddyn nesaf, neu'n cynilo er mwyn cael car a'ch bod yn gwybod faint fydd ei angen arnoch o fewn amser penodol.

Gellir cael ISAs gan fanciau a chymdeithasau adeiladu yn ogystal â Chynilion a Buddsoddiadau Cenedlaethol.

• Mwy o wybodaeth am ISAs (adran arian, treth a budd-daliadau)

Mwy o ddolenni defnyddiol

• Mwy am gynilion a buddsoddiadau (adran arian, treth a budd-daliadau)

• Canllaw i gynilion gan need2know Opens new window

• Cynilo ar gyfer eich car cyntaf Opens new window