Gwefan llywodraeth y DU

Pam dod yn wirfoddolwr?

P'un a ydych chi'n dal i weithio neu wedi ymddeol, mae nifer o bethau i'w cofio os penderfynwch ddod yn wirfoddolwr. Bydd angen i chi gyfrifo faint o amser y gallwch ei roi, a pha mor hyblyg y bydd angen i'ch oriau fod. Bydd y rhan fwyaf o elusennau mawr yn talu costau teithio. Ond os ydych chi'n ystyried gwirfoddoli gyda mudiad llai, efallai y bydd rhaid i chi dalu am eich teithio eich hun.

Gwirfoddoli yn eich cymuned leol

Mae llawer o wahanol brosiectau y gallwch gymryd rhan gyda hwy'n lleol. Gall neilltuo awr neu ddwy yr wythnos yn unig wneud gwahaniaeth go iawn yn eich ardal leol.

• Gwefan Gwirfoddolwyr Gwasanaeth Cymunedol Opens new window

• Chwilio am gyfleoedd gwirfoddoli yn eich ardal leol Opens new window

Dod yn hyfforddwr neu'n fentor

Yn aml, mae pobl hŷn yn addas ar gyfer swyddogaethau mentora neu hyfforddi. Gallwch ddefnyddio eich sgiliau a'ch profiadau bywyd gwerthfawr i helpu pobl eraill i ddatblygu eu sgiliau ac ennill hyder. Yn gyfnewid am hynny, gallwch ddatblygu eich sgiliau ymwneud-â-phobl eich hun ac aros yn weithgar.

• Dod yn hyfforddwr neu'n fentor

Gwirfoddoli gwyrdd

Mae sawl ffordd y gallwch helpu'r amgylchedd drwy wirfoddoli. Yn aml, rhedir prosiectau cadwraeth yn lleol gan gynghorau a mudiadau gwirfoddol. Hefyd, ceir 'campfeydd gwyrdd' a drefnir gan Ymddiriedolaeth Gwirfoddolwyr Cadwraeth Prydain, sy'n eich helpu i ddod yn heini a helpu ar yr un pryd.

Gweithio gydag anifeiliaid

Gellir cael llawer o foddhad o weithio gydag anifeiliaid a gall ddarparu meysydd diddordeb newydd. Mae nifer o elusennau anifeiliaid sy'n cynnig cyfleoedd i wirfoddoli, o weithio'n uniongyrchol gydag anifeiliaid mewn canolfannau achub i helpu i drefnu digwyddiadau i elusennau. Gallwch hefyd helpu i fonitro'r bywyd gwyllt yn eich ardal leol.

• Gwirfoddoli i weithio gydag anifeiliaid (adran cartref a chymuned)

Sefydlu cynllun gwirfoddoli yn y gwaith

Gyda'r math hwn o wirfoddoli, bydd gweithiwr yn gwirfoddoli gyda chefnogaeth y cyflogwr, naill ai yn ystod oriau gwaith neu y tu allan iddynt. Os ydych chi'n ystyried sefydlu cynllun gwirfoddoli yn y gwaith, bydd yn rhaid i chi benderfynu sut fyddech chi'n hoffi cymryd rhan. Hefyd bydd yn rhaid i chi benderfynu beth rydych chi eisiau ei wneud i helpu.

• Sefydlu cynllun gwirfoddoli yn y gwaith (adran cartref a chymuned)

Rhaglen Wirfoddoli i Bobl Hŷn a Phobl sydd wedi Ymddeol

Sefydliad sy'n darparu cyfleoedd gwirfoddoli i bobl dros hanner cant oed yng Nghymru, Lloegr a'r Alban yw'r Rhaglen Wirfoddoli i Bobl Hŷn a Phobl sydd wedi Ymddeol. Caiff gwirfoddolwyr wneud beth bynnag y dymunant, a dewis pryd i'w wneud. Ceir amrywiaeth eang o weithgareddau a phrosiectau – mewn grwpiau neu'n unigol. Mae'r gweithgareddau'n cynnwys gwau, prosiectau amgylcheddol, gwneud ffrindiau a llawer mwy.

• Rhaglen Wirfoddoli i Bobl Hŷn a Phobl sydd wedi Ymddeol Opens new window

Mwy o ddolenni defnyddiol

• Canllawiau i gyfleoedd ar ol ymddeol

• Canllawiau i fyw'n fwy gwyrdd i bobl dros 50

• Elusennau a grwpiau cymunedol (adran cartref a chymuned)

• Gwirfoddoli a derbyn budd-daliadau (adran cartref a chymuned)